Almaty teatrlary álemniń eń iri Avignon OFF 2025 teatr festıvalinde sátti óner kórsetti, - dep habarlaıdy Aqshamnews.kz tilshisi.
Avignon OFF 2025 atty aıtýly halyqaralyq festıválde Almaty teatrlarynyń qoıylymdary anshlagpen ótti. Journées de l’Asie centrale baǵdarlamasy aıasynda Qazaqstan qonaq el retinde qatysyp, Almaty basty mádenı ortalyqqa aınaldy. Qala teatr óneriniń eń ozyq týyndylaryn pash etti.
Festıváldiń resmı afıshasyna Almatydan tórt teatr kirip, kórermenniń, halyqaralyq tálimgerler men teatr synshylarynyń úlken qyzyǵýshylyǵyn týdyrdy. ARTiShok teatry Atypik Théâtre sahnasynda «Maıakovskıı» performansyn qoısa, Jolda Dance Theatre «Tamyr» qoıylymyn La Scierie sahnasynda kórsetti. Almaty Memlekettik qýyrshaq teatry ataqty «Romeo men Djýletta» mahabbat odasyn La Scierie sahnasynda sahnalady. Al «Alataý» teatry Rouge Gorge sahnasynda «Dala rapsodıasy» qoıylymymen almatylyq teatrlardyń ónerin túıindedi.
Almatynyń bul festıválge qatysýy jaı ǵana jeńis emes, Qazaqstandaǵy táýelsiz teatr óneriniń damýyna jol ashqan tarıhı oqıǵaǵa aınaldy.
Alǵash ret qazaqstandyq teatrlarǵa Eýropanyń eń iri festıvaliniń sahnasynda osyndaı keń múmkindik berilip, jańa halyqaralyq áriptestikke jáne otandyq teatrdy tanytýǵa jol ashyldy.
Almaty teatrlarynyń Fransıa jerindegi ónerin Almaty Creative shyǵarmashylyq ındýstrıalardy damytý ortalyǵy Almaty qalasy ákimdiginiń qoldaýymen uıymdastyrdy.
Ortalyqtyń júıeli jumysynyń arqasynda alǵash ret biryńǵaı kýratorlyq irikteý júrgizilip, festıvál uıymdastyrýshylarymen, halyqaralyq ınstıtýttarmen jáne BAQ-pen ózara baılanys jolǵa qoıyldy.