Almatydaǵy A.Chehov atyndaǵy ortalyq kitaphanada Qazaqstan Respýblıkasy Konstıtýsıasynyń 30 jyldyǵyna arnalǵan «Ádilet pen parasat joly» taqyrybynda «dóńgelek ústel» ótti, dep habarlaıdy Aqshamnews.kz.
Ata zańǵa qurmet retinde kórermen zalyna áskerı jas sarbazdar elimizdiń Memlekettik týyn saltanatpen alyp kirdi. Ánuran oryndaldy.
«Dóńgelek ústel» basyndaǵy dıalogtyń betashar sózin sóılegen Qazaqstan halqy Assambleıasy tóraǵasynyń orynbasary Rasýl Ahmetov Konstıtýsıamyzdyń mańyzdylyǵyna toqtaldy. Profesor, Ulttyq zań akademıasynyń akademıgi Aqylbek Isabekov, aqyn, ǵalym Ádilǵazy Qaıyrbekov, Almaty qalalyq advokattar alqasynyń músheleri – Baýyrjan Seralın, Rýslan Qanseıtov, Tımýr Rahymbaı, Radıoelektronıka jáne baılanys áskerı ınjenerlik ınstıtýtynyń qyzmetkeri, aǵa leıtenant Móldir Aqjolqyzy jáne taǵy basqa da meımandar oı órbitti.
Jınalǵan qaýymǵa A.Chehov atyndaǵy ortalyq kitaphananyń qyzmetkeri Symbat Asanova oqyrman zalynda uıymdastyrylǵan «Ata zań – memleket tiregi» atty kitap kórmesine bıblıografıalyq sholý jasady.
Ata zań – memlekettiligimizdiń myzǵymas tiregi ári elimizdiń saıası jáne qoǵamdyq qurylysyn, aınymas qundylyqtary men damý jolyndaǵy strategıalyq baǵyt-baǵdaryn aıqyndaıtyn basty qujatymyz. Ol búgingi otyz jyldyq belesinde ultty uıystyrýdyń naǵyz sımvolyna aınaldy. Sondaı-aq, eldiń saıası júıesin demokratıalandyrýdy, zań ústemdigin qamtamasyz etýdi jáne halyqtyń ál-aýqatyn arttyrýdy kózdeıtin aýqymdy ózgeristerdiń berik tuǵyry sanalady.
Ádilǵazy QAIYRBEKOV, Halyqaralyq «Alash» ádebı syılyǵynyń laýreaty:
"Ata zań – bizdiń baǵdarsham. Árbir adam onyń bıik murattaryn qoldaı bilýi kerek. Al zań, tártip bar jerde ómir de mándi bolady. Osy Konstıtýsıany oqyp otyrǵan kezde kóńilime árkez jyly ushyraıtyny – toǵyzynshy baby. Onda Qazaqstan Respýblıkasynyń Týy, Eltańbasy jáne Gımni týraly sıpattama beriledi jáne olardy resmı paıdalaný tártibi konstıtýsıalyq zańmen belgilengeni kórsetilgen. Shyny kerek, maǵan ártúrli jıyndarda kishkentaı baldyrǵandardyń qolynda jelbirep turatyn kishkentaı ǵana kók jalaýshanyń ózi de shabyt beredi, kóńilimdi asqaqtatady. Gımn oryndalǵanda úlken-kishi alaqanyn júrek tusyna qoıatyn sát te erekshe. Árqaısymyzdyń júregimizde osyndaı patrıottyq sezim uıalǵan bolsa, biz almaıtyn qamal bolmasy anyq. Jas urpaq qasıetti rámizderimizdi árkez qadirlep júrse eken degen tilegim bar" dedi ol.
Aıdos BEKTURSYN, jas maman, Qazaqstan Jazýshylar kitaphanasynyń qyzmetkeri:
"Ata Zańymyzdyń on toǵyzynshy baby azamattardyń mádenıeti men bilim alý quqyna kepildik beredi. Al bul jolda biz sekildi kitaphana qyzmetkerleri de úlken úles qosyp júr. Kitaphana – sóresinde kitaptar jınalyp turǵan oryn ǵana emes, sonymen qatar ol – aqparattyq, mádenı jáne áleýmettik keńistik. Biz oqyrmandarǵa kitappen birge, bilim, ıdeıalar jáne jańa múmkindikter usynamyz. Múmkindigi shekteýli turǵyndarǵa da erekshe jaǵdaı jasalǵan. Iaǵnı Ata Zań mindettegendeı, sıfrlandyrý baǵdarlamasy arqyly barlyq oqyrmanǵa elektrondyq resýrstarǵa qol jetkizý múmkindigin qamtamasyz ettik. Jas urpaqty patrıottyq tárbıeleýge baǵyttalǵan tyń jobalardy júzege asyrý jolǵa qoıylǵan. Biz azamattardyń aqparattyq saýatyn arttyrýǵa kómektesemiz. Bilim izdegen stýdentter úshin – oqý zaly, zeınetkerler úshin – áleýmettený ortalyǵy, al mektep oqýshylary úshin – ıntellektýaldyq oı-órisin damytýǵa jol ashatyn alań uıymdastyrylǵan. Demek, Konstıtýsıa – bul tek quqyqtyq qujat emes, bizdiń jarqyn bolashaǵymyzdyń kepili" dep pikir bildirdi.