Almaty ákimdigi qalanyń jasyl jelek qoryn saqtaý men damytýǵa áleýmettik jaýapty bıznesti tartý baǵytyndaǵy jumysty júıeli túrde jalǵastyryp keledi.
Osy joly megapolıste eń mańyzdy tabıǵı nysandardyń biri Baým atyndaǵy toǵaıdy abattandyrý jobasy qolǵa alyndy. Igi bastama qurylys salasynda tanymal BAZIS-A kompanıasynyń qoldaýymen júzege asady. Kompanıa bul maqsatqa 4,7 mlrd teńge bólip otyr.
Baým toǵaıy — Almatynyń «ókpesi» atanǵan, aýmaǵy 137,7 gektar bolatyn biregeı orman alqaby. Bul jer qaladaǵy sırek saqtalǵan tabıǵı landshaft pen alýan túrli aǵash túrlerin boıyna syıdyrǵan qundy jasyl aımaq sanalady. Toǵaı Almatynyń bıoalýandyǵyn saqtap, qolaıly mıkroklımat qalyptastyrýda orasan ról atqarady.
Abattandyrý jobasynyń maqsaty ekojúıege zıan keltirmeı, demalys pen serýenge arnalǵan ınfraqurylymdy uqypty engizý. Jumystar tabıǵı ortaǵa aralasýdy barynsha azaıtýmen, jer bederi men aǵashtardyń tamyr júıesin jáne jasyl jelektiń tabıǵı qalpyn saqtaı otyryp júrgiziledi. Joba aıasynda shaǵyn sáýlettik pishinder ornatylady, tynyshtyq pen tabıǵı úndestikti saqtaıtyn serýen joldary men demalys aımaqtary jasalady.
Toǵaı aýmaǵyn tabıǵı erekshelikterine qaraı durys aımaqtarǵa bólýge erekshe kóńil bólinbek: bir bóligi tynysh demalysqa arnalsa, ekinshi bóligi ekologıalyq aımaq retinde ınfraqurylymy shekteýli kúıde qalyp, tabıǵatty qorǵaý men ekologıalyq aǵartýǵa baǵyttalady. Mundaı tásil qala turǵyndaryna alyp shahardyń ishinde tabıǵatpen úılesimdi ári uqypty qarym-qatynas jasaýǵa múmkindik beredi.
Baým toǵaıyn abattandyrý qala ormanyn qorǵaý men ornyqty qala ortasyn qalyptastyrý jolyndaǵy mańyzdy qadam bolmaq. Almaty ákimdigi aldaǵy ýaqytta da áleýmettik jaýapkershiligi joǵary bıznesti qala aýmaǵyn kógaldandyrýǵa, tabıǵı aımaqtardy qorǵaýǵa jáne turǵyndardyń jaıly ómir súrýine baǵyttalǵan bastamalarǵa tartý jumysyn jalǵastyra beredi.