Qazaqstanda 75 jańa mamandyq paıda boldy, - dep habarlaıdy Aqshamnews.kz tilshisi.
Jańa mamandyqtar atlasynda Ónerkásip jáne qurylys mınıstrligi jetekshilik etetin salalar boıynsha 75 jańa mamandyq bar. Bul týraly Úkimet otyrysynda vıse-mınıstr Iran Sharhan málimdedi.
"Metalýrgıa jáne taý-ken óndirisi salasynda smart júıelerdi ázirleýshi, robottandyrylǵan taý tehnıkasynyń operatory, mashına jasaý salasynda vırtýaldy prototıpteýshi mamany, qurylysta Big Data taldaýshysy, "Aqyldy úı" jobalaýshysy sıaqty jańa mamandyqtar paıda boldy. Sonymen qatar, bıznes prosesterdi avtomattandyrýǵa baılanysty 40-tan asa mamandyq ózgeriske ushyrady", - dedi Iran Sharhan.
Bıyl mashına jasaý salasynda taǵy 8 jańa mamandyq paıda bolatyny aıtyldy. Olardyń qatarynda 3D basyp shyǵarý jáne dánekerleý ınjeneri, robottandyrylǵan boıaý júıeleriniń operatory bar.