Almaty-akshamy.kz saıtynyń 16 qańtardaǵy jańalyqtaryna sholý
Almatyda dámhana órtendi
Almaty qalalyq Tótenshe jaǵdaılar departamentiniń málimeti boıynsha, órt sóndirýshiler kelgen sátte «Taýfık» dámhanasynyń shatyry janyp jatqan. Janyp jatqan ǵımarattan 7 gaz balony syrtqa shyǵaryldy. Avtosısternalardan órt oqpandary dereý engizilip órtke qarsy gıdranttaryna ornatyldy, sýdyń úzdiksiz berildi. 150 sharshy metr jerdi sharpyǵan jalyndy óshirý úshin 30 adam, 10 tehnıka tartyldy.
500 teńgelik avtoturaq
Búgin Almaty áýejaıy avtoturaq tarıfin kótergeni týraly aqparat tarady. Endi áýe aılaǵyna kúnine eki retten kóp emes 15 mınýtqa tegin kire alasyz. Munan basqa shlagbaýmnan árbir ótkenińiz úshin aqy tóleıtin bolasyz. Sonymen:
15 mınýttan 1 saǵatqa deıin – 500 teńge;
1 saǵattan 2 saǵatqa deıin – 700 teńge;
2 saǵattan 4 saǵatqa deıin – 1000 teńge;
4 saǵattan 6 saǵatqa deıin – 1500 teńge;
6 saǵattan 12 saǵatqa deıin – 2400 teńge;
12-den 24 saǵatqa deıin – 3500 teńge;
24 saǵattan astam, keıingi tolyq jáne ishinara kúnderge – 5 000 teńge.
«Qazaqstan halqyna» aqshany kim beredi?
Qordyń resýrstary qaıyrymdylyq jarnalary esebinen qalyptastyryldy. Qazirgi ýaqytta qorǵa 196,6 mlrd teńge túsken. Onyń ishinde 2 jyl ishinde Qor jalpy somasy 90,9 mlrd teńgege qaıyrymdylyq kómek kórsetti.
131 mlrd teńgeni 60 qazaqstandyq kompanıa, 20 mlrd teńgeden sál astam somany «Samuryq - Qazyna» qory aýdarǵan, al 39 mlrd teńge iri donor-jeke tulǵalardan túsken. Mysaly, birneshe kún buryn úsh qurylys kompanıasynan balalar men jastarǵa protez jasaý jobasyn iske asyrýǵa 500 mln teńge tústi.
Elimizge álemdegi eń qymbat preparat ákelindi
«Zolgensmanyń» naryqtaǵy baǵasy - 2 mıllıon 100 myń dollar turady. «Qazaqstan halqyna» qory densaýlyq saqtaý salasynda jalpy somasy 103,3 mlrd teńgege 12 qaıyrymdylyq baǵdarlamasy men jobasyn iske asyrýda.
39 preparat satyp alyndy, onyń 9-y alǵash ret Qazaqstanda satyp alyndy, onyń ishinde álemdegi eń qymbat «Zolgensma» preparaty bar. Satyp alýdyń jalpy somasy 31,6 mlrd teńgeni qurady. Ahondroplazıamen aýyratyn 10 bala súıektiń ósýin yqpal etetin ınovasıalyq Vokssogo (Vosorıtıd) preparatyn qabyldaýdy bastady.
Áıeline álimjettik kórsetken ánshi
Rahat Turlyhanovty 10 kúnge qamaý týraly qaýly zańdy kúshine endi. Almaty qalalyq soty Rahat Turlyhanovqa qatysty uryp-soǵý deregi boıynsha ákimshilik quqyq buzýshylyq boıynsha isti qarady. Atalǵan materıaldy qaraý barysynda sot alqasy onyń buryn áıelin birneshe ret uryp-soqqanyn eskerip, birinshi satydaǵy sottyń taǵaıyndaǵan jazasymen kelispedi. Osylaısha qaýly ózgerip, ákimshilik quqyq buzýshylyq týraly kodekstiń 73-2-babynyń 1-1-bóligine sáıkes, Turlyhanovqa qatysty jaza eskertýden 10 táýlikke qamaýǵa ózgerdi.
Kúrshimde tótenshe jaǵdaı
7 qańtardan bastap qar men boran toqtamaı turǵan Shyǵys Qazaqstan oblysynyń Kúrshim aýdanynda tabıǵı sıpattaǵy tótenshe jaǵdaı jarıalandy. Keıbir jerlerde qardyń qalyńdyǵy 1.8-2 metrge jetti. Marqakól jáne Tosqaıyn aýyldyq okrýgteriniń eldi mekenderi kólik qatynasynan ajyratyldy.
Elektrdiń jyryn aıt!
Elimizde elektr tarıfteri qaıta qaralýy múmkin. Energetıka mınıstrligine shekti tarıfti kóterý týraly ótinish túsken.
«Biz bul suranystyń qurylymyn, keıbir shyǵyndar túrlerin arttyrýdyń oryndylyǵyn zertteıtinimiz anyq. Buryn ulǵaıtý jóndeý jáne retteý jumystaryna baǵyttalǵan bolatyn ishinara jalaqymen. Shyǵyndardy azaıtýǵa jáne ınvestısıalyq baǵdarlamany júzege asyrýǵa baılanysty basqa da shyǵyndar bar ekeni anyq, ıaǵnı egjeı-tegjeıli qarastyramyz. Biz elektr energıasy tarıfiniń kúrt ósýine jol bermeıtinimiz anyq», dep sendirdi Energetıka mınıstrliginiń basshysy Almasadam Sátqalıev.
Erjan Sádenov tyńdap tur!
Búgin İshki ister mınıstri Instagram paraqshasynda ózine qalaı tikeleı júginýge bolatynyn aıtty.
«Aýqymdy ári jaýapty isti qolǵa aldyq. Bul rette el turǵyndarynyń keri baılanysy óte mańyzdy. Búgingi qoǵamda áleýmettik jeliler tıimdi baılanys quraly ekeni sózsiz. Facebook jáne Instagram áleýmettik jelilerinde jeke paraqshalarymnyń bar ekenin eske salamyn. Osy paraqshalar arqyly menimen baılanysqa shyǵýǵa bolady. Ashyq dıalog ornatýǵa árqashan daıynmyn», dedi mınıstr.
Staqanda da syr bar...
Almaty polısıasy esirtki kýrerleri betbelgi qoıý úshin kofe staqandaryn paıdalanatynyn aıtty.
«Qaskóılerdiń jalǵa alǵan úıinen, atap aıtqanda, tońazytqyshtan jalpy salmaǵy 2 kelige jýyq untaqty zat salynǵan 745 býma tabyldy jáne tárkilendi. Ustalǵandar qylmystaryn moıyndap, esirtkini kóp mólsherde Almaty oblysynyń eldi mekenderinen alǵandaryn aıtty. Kúdiktiler iri kólemdegi esirtkini kofe staqandaryna jasyrǵan», dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
Kúmándiler klýbynda bılegen muǵalimder
Túrkıada demalǵan eki qyzylordalyq muǵalim jumystan shyqty. Shetel asqan muǵalimder ózderiniń demalysyn áleýmettik jeli arqyly kórsetip otyrǵan. Eń soraqysy, pedagogtar shetelde júrip, birneshe márte transvıstıtter klýbynda kóńil kótergen. Ustazdardyń bul áreketin ata - analar áleýmettik jeliler arqyly kórip, ustazdardyń mektepten ketýin talap etken.
«Ustazdardyń áreketin pedagogıkalyq keńeste talqyladyq, jınalysqa ádeıilep tek áıel muǵalimderdi qatystyrýdy jón kórdim. Jınalystan keıin ustazdar óz erikterimen jumystan ketý týraly aryzdaryn jazdy. Ol kisiler tek ustaz ǵana emes, sonymen qatar bala tárbıelep otyrǵan ana. Áriptesterimizdiń mundaı áreketke barǵandary óte uıat boldy», dedi mektep dırektory Gúljahan Narbaeva.