Almatyda avtobýs júrgizýshisi rúlge ıe bola almaı, kópirdiń beton tiregine soǵylyp, saldarynan tórt jolaýshy zardap shekti.
Almaty qalalyq polısıa departamentiniń málimetinshe, jol apaty 5 naýryz kúni saǵat 06:45-te bolǵan, dep habarlaıdy almaty-akshamy.kz.
«Jeke tasymaldaýshyǵa tıesili qoǵamdyq kóliktiń júrgizýshisi 1966 jyly týǵan azamat D., Súıinbaı dańǵylymen soltústik baǵytta kele jatyp Sholohov kóshesine burylar tusta, rúldi basqara almaı, kópirdiń beton tiregine soǵyldy. Saldarynan tórt jolaýshy jaraqat alyp, dárigerlerdiń kómegine júgindi», - dep habarlady Almaty polısıa departamentiniń baspasóz qyzmetinen.
Jol-kólik apaty boıynsha sotqa deıingi tergeý bastalyp, tıisti saraptamalar taǵaıyndaldy.
Buǵan deıin Medeý aýdanynda bala jetektegen áıeldi avtobýs qaǵyp ketkenin jazǵan bolatynbyz.