Bıyl aýyldardyń ınfraqurylymyn damytýǵa 900 mlrd teńge bólindi.
Bul týraly búgin Úkimet otyrysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov aıtty, dep habarlaıdy almaty-akshamy.kz.
«Aýyl - el besigi» baǵdarlamasyn iske asyrý aýyldyq jerlerge jeke ınvestısıalar tartýǵa oń áserin tıgizýde. Mınıstrlik tarapynan 2023 jyly búdjet qarajaty shyǵystarynyń tıimdiligine taldaý júrgizildi. Mysal retinde, Túrkistan oblysynyń Tóle bı aýdanynyń 16 aýyly 3,5 mlrd teńgege búdjetten qarjylandyryldy. Osy aýyldarda 21,2 mlrd teńgege 40 jobany iske asyrýǵa jeke ınvestısıa tartyldy. Osylaısha, 1 búdjettik teńgege 6 jeke ınvestısıa teńgesi tıesili ekenin kórip otyrmyz. Al Aqmola oblysynyń Jaqsy aýdanynyń 6 aýylyna 1 búdjettik teńgege 3 jeke ınvestısıa teńgesi tartyldy», - dedi ol.
Mınıstr aýyldyq aýmaqtardy damytýǵa ınvestısıa salatyn jeke kásipkerlerdiń mańyzdy rólin de atap ótti.
«2023 jyly kásipkerler óz qarajaty esebinen aýyldyq jerlerde mektepter, shıpajaılar, balabaqshalar, demalys oryndary jáne basqa da nysandar saldy. Mınıstrlik tarapynan jyl saıyn barlyq qarjy kózderi esebinen aýyldardyń ınfraqurylymyn damytýǵa bólinetin qarajatqa monıtorıń júrgiziledi. Máselen, 2023 jyly respýblıkalyq jáne jergilikti búdjetterden, sondaı-aq basqa da qarjy kózderinen shamamen 1 trln. teńge áleýmettik, ınjenerlik, kóliktik ınfraqurylymdy, qoǵamdyq jáne ekologıalyq qaýipsizdikti damytýǵa baǵyttalǵan. Bıyl bul maqsattarǵa shamamen 900 mlrd teńge josparlanǵan», - dedi Nurlan Baıbazarov.