Medısına mekemeleriniń jartysynan kóbi tozyǵy jetken.
Densaýlyq saqtaý mınıstri Ajar Ǵınıat 2023 jyly aýyldarda qansha feldsherlik pýnkt, feldsherlik-akýsherlik pýnkt (FAP) jáne dárigerlik ambýlatorıa salynatynyn aıtty, dep habarlaıdy Almaty-akshamy.kz.
Densaýlyq saqtaý mınıstri Úkimettiń «Aýyldaǵy densaýlyq saqtaý salasyn jańǵyrtý» ulttyq jobasyn maquldaǵanyn eske saldy.
«Ulttyq joba aıasynda 2023 jyly 309 MSAK nysanynyń qurylysy qarastyrylady. Onyń ishinde 131 feldsherlik pýnkt, 99 FAP, 79 dárigerlik ambýlatorıa salynady. Sonymen qatar 11 ortalyq aýdandyq aýrýhanaǵa kúrdeli jóndeý jasalyp, jańartylady. Onda qalalarǵa barmaı-aq, «Altyn saǵat» qaǵıdatyn saqtaı otyryp, ınfarkt, ınsýlt, jaraqat jáne basqa da jaǵdaılarda jedel mamandandyrylǵan jáne joǵary tehnologıalyq medısına kómegin bere alatyn, sonyń ishinde telemedısına jáne qashyqtaǵy medısınalyq qyzmetter arqyly emdeı alatyn múmkindikter qarastyrylady», - dedi Ajar Ǵınıat.
Onyń aıtýynsha, ulttyq joba aıasynda densaýlyq saqtaý uıymdaryn 575 zamanaýı medısına qural-jabdyqtarymen qamtamasyz etý qarastyrylǵan. Sonymen qatar 2023 jyly 307 medısına qyzmetkeri oqytylady. Onyń 54-i - jalpy tájirıbe dárigeri, 253-i - orta medısına qyzmetkerleri.
Densaýlyq saqtaý mınıstrliginiń málimetinshe, aýyl turǵyndaryn profılaktıkalyq tekserýler bıyl da jalǵasyp, 3,2 mıllıon adam qamtylady. Shalǵaıdaǵy aýyldardyń turǵyndaryna jyljymaly medısına keshenderi arqyly qyzmet kórsetý 1,5 mıllıon adamdy qamtıdy. Jalpy 2,4 mıllıonnan astam aýyl turǵyny qosymsha mamandandyrylǵan medısına kómegin alady.
2022 jyldyń 22 qarashasynda Ajar Ǵınıat Úkimet otyrysynda Qazaqstan aýyldaryndaǵy medısına mekemeleriniń jartysynan kóbi tozyǵy jetkenin aıtty.