Memleket basshysy Agroónerkásip keshenin damytýdyń ulttyq jobasynyń oryndalmaýyna toqtaldy, dep habarlaıdy Almaty-akshamy.kz.
«Agroónerkásip keshenin damytýdyń ulttyq jobasyndaǵy josparlar oryndalmaı jatyr. Mysaly, aýyl sharýashylyǵy ónimin óńdeýge qatysty 65 jobany júzege asyrý josparlanǵan. İs júzinde onyń 31-i ǵana iske qosyldy. Sol sıaqty 7 qus fabrıkasynyń ornyna 3 fabrıka salyndy. Balyq óndiretin 11 jobanyń jeteýi ǵana paıdalanýǵa berildi.
Biz elimizdi negizgi azyq-túlikpen tolyq qamtamasyz etýimiz kerek. Sondyqtan Úkimet josparlanǵan barlyq jobalardy júzege asyrýǵa mindetti», - dedi Prezıdent.
Prezıdent kelesi jyly aýyl sharýashylyǵy kooperasıasyn damytý jónindegi aýqymdy jobanyń bastalatynyn aıtty. Oǵan 1 trıllıon teńge bólinedi. Bul joba 1 mıllıon aýyl turǵynyn qamtıdy.
«Sondaı-aq aýyldaǵy áleýmettik salada ózgerister bolady. Aýyldyń densaýlyq saqtaý júıesin jańǵyrtý úshin arnaıy joba qolǵa alynady. Shamamen 700 jańa medısına nysany salynady. Kóp salaly 32 aýdandyq aýrýhanada jańǵyrtý jumystary júrgiziledi. Osynyń bárine 200 mıllıard teńgeden astam qarajat bólinedi.
Jalpy, aımaqtarda ınfraqurylymǵa qatysty máseleler az emes. Turǵyn úı tapshylyǵy, jylý, energıa jáne sý jelileriniń eskirgeni, joldardyń tozyp turǵany barshaǵa málim. Búgingi basqosýǵa oblys ákimderi qatysyp otyr. Jańadan taǵaıyndalǵan basshylar da bar. Sizderge senim artamyz. Ár aımaqty turmys sapasy joǵary «qýatty óńirge» aınaldyrý úshin zor múmkindik berilip otyr. Tabandy jumys isteý qajet», - dep atap ótti Q.Toqaev.