QR Aýyl sharýashylyǵy mınıstri Aıdarbek Saparov Túrkıanyń aýyl jáne orman sharýashylyǵy mınıstriniń orynbasary Ebýbekır Gızlıgıdermen kezdesti.
ASHM basshysy Túrkıa Respýblıkasymen aýyl sharýashylyǵyndaǵy yntymaqtastyq Qazaqstan úshin basym baǵyttardyń biri ekenin atap ótti. Máselen, eki el arasyndaǵy AÓK ónimi boıynsha taýar aınalymy 2023 jyldyń 11 aıynda 19%-ǵa ósip, 300 mln AQSH dollaryn qurady.
Aıdarbek Saparov ózara saýdany ulǵaıtý, jetkiziletin taýarlar nomenklatýrasyn keńeıtý jónindegi jumysty jalǵastyrýdy usyndy. Mınıstrdiń aıtýynsha, Túrkıanyń aýylsharýashylyq shıkizatyn óńdeý salasyndaǵy jetistikterin eskere otyryp, Qazaqstan osy saladaǵy yntymaqtastyqty damytýǵa múddeli.
«Mınıstrlik túrik ınvestorlaryna járdemdesýge, Qazaqstan taraptan seriktester izdeýge daıyn», - dep atap ótti A.Saparov.
Ol sondaı-aq Qazaqstannyń Eýrazıalyq ekonomıkalyq odaqtyń múshesi bolyp tabylatynyn, bul jergilikti óndiris ónimderin eksporttaý múmkindikterin keńeıtetinin atap ótti.
ASHM basshysynyń usynystaryn prezıdent Rejep Erdoǵannyń «Qazaqstan – Túrkıa ınvestısıa salýy tıis el» degen sózin keltire otyryp, Ebýbekır Gızlıgıder qoldady. Ebýbekır Gızlıgıder tuqym, jylyjaı sharýashylyǵyna jáne sýarýdy damytýǵa ınvestısıa salýǵa qyzyǵýshylyǵyn atap ótti.
Qorytyndylaı kele, Aıdarbek Saparov Ebýbekır Gızlıgıderdi 2024 jylǵy 19-22 naýryzda Taraz qalasynda ótetin Túrki memleketteri uıymyna múshe memleketterdiń aýyl sharýashylyǵy mınıstrleriniń kezdesýine qatysýǵa shaqyrdy.