Jer túgendeý baǵytyndaǵy tekserýler jandanǵan sátten bastap iri jer ıelenýshileri bos jatqan alqaptaryn belsendi ıgere bastaǵan.
Bul jaıly Aýyl sharýashylyǵy vıse-mınıstri Ábilhaıyr Tamabek vedomstvonyń keńeıtilgen alqa májilisinde málim etti, dep habarlaıdy Almaty-akshamy.kz QazAqparatqa silteme jasap.
«Jer ınspeksıasynyń jumysyn kúsheıtý esebinen Memleket basshysynyń 2022 jyldyń sońyna deıin paıdalanylmaı jatqan jáne zańnamany buza otyryp berilgen 5 mln gektardan kem emes jerdi qaıtarý jónindegi tapsyrmasy merziminen buryn oryndaldy.
Ótken jylmen salystyrǵanda, tekserýler sany 9 esege, al tekserýmen qamtylǵan aýmaq 21 esege ósti», - dedi Ábilhaıyr Tamabek.
Onyń sózine qaraǵanda, atalǵan jer túgendeý jumystary jerdi ıgerý jumystarynyń jandanýyna túrtki bolǵan.
«Olar qazirdiń ózinde shamamen 1,8 mln gektar jerdi ıgerýdi bastady. Bul, ótken jylmen salystyrǵanda, 6 ese artyq.
Halyq malyn jaıý úshin jaıylym tapshylyǵy problemasyn sheshý úshin sharalar qabyldanýda.
Birinshi kezekte aýyldyq eldi mekenderdiń shekaralary memleketke qaıtarylǵan jaıylymdyq alqaptar men jerler, sondaı-aq memleket muqtajy úshin alynǵan jerler esebinen keńeıtiledi. Aýyl sharýashylyǵy quralymdarymen olardyń jaıylymdaryn jeke qosalqy sharýashylyqtardyń ýaqytsha paıdalanýy týraly memorandýmdar jasalady. Jaıylymdardy basqarý jónindegi is-sharalar sheńberinde olarǵa bosalqy jerlerden jaıylymdyq alqaptar bere otyryp, jeke qosalqy sharýashylyqtardyń kooperasıasy boıynsha jumys júrgizilýde», - dedi mınıstrdiń orynbasary.