Almatynyń Áýezov aýdanynda buryn jaryq jelileri men baǵana bolmaǵan 81 aýmaqta alǵash ret syrtqy jaryqtandyrý júıesi iske qosyldy. Bul turǵyndar úshin mańyzdy jańalyq. Talaı jyl boıy qarańǵy bolyp kelgen aýlalar men kósheler endi jaryq, jaıly jáne qaýipsiz bola tústi. Bul týraly Áýezov aýdanynyń ákimdigi habarlady.
Jobany «RKR Group and Co» JSHS júzege asyrdy. Onyń aıasynda 828 zamanaýı sham ornatyldy: sonyń ishinde 507-i kóshe boıyna, 321-i aýlalarǵa arnalǵan torsherli sham. Jańa elektr jelileriniń jalpy uzyndyǵy 15 shaqyrymnan asty. Barlyq negizgi jumys aıaqtaldy, merdiger uıym usaq-túıek eskertýlerdi rettep jatyr.
Budan bólek, áli de jaryqtandyrý tolyq qamtylmaǵan aýmaqtarǵa erekshe kóńil bólinip otyr. Atap aıtqanda, bul Saın, Abaı, Momyshuly, Tóle bı, Jandosov jáne Raıymbek sıaqty iri magıstraldar. Bul kóshelerdiń tolyq jaryqtandyrylýy Almaty qalasynyń qoǵamdyq keńistikterdi damytý basqarmasynyń «qasbetten qasbetke deıin» qaǵıdaty boıynsha iske asyrylatyn jobalary aıasynda qamtamasyz etiledi. Ýaqytsha sheshim retinde munda 203 kronshteın shamy ornatylǵan.
«Bul joba aýdannyń damýy úshin mańyzdy qadam. Biz tek sham ornatýmen shektelmeı, qalalyq ortanyń sapasyn jaqsarttyq. Endi kóshe men aýla qaýipsiz ári zamanaýı. Barlyq josparlanǵan joba aıaqtalǵan soń aýdannyń syrtqy jaryqtandyrý deńgeıi 100%-ǵa jetedi», – dedi Áýezov aýdany ákimdiginiń komýnaldyq sharýashylyq bóliminiń basshysy Ersultan Jumahanov.