Almatyda densaýlyq saqtaý ınfraqurylymy belsendi damyp keledi. Óńirlik komýnıkasıalar qyzmetiniń alańynda Almaty qalasy Áýezov aýdanynyń ákimi Abzal Egemberdıev habarlaǵandaı, aýdanda turǵyndarǵa medısınalyq qyzmetterdiń qoljetimdiligi men sapasyn arttyrýǵa baǵyttalǵan birqatar jobalar sátimen iske asyp jatyr.
Búgingi tańda aýdan aýmaǵynda 11 memlekettik medısınalyq uıym jumys isteıdi – 5 qalalyq emhana, 6 stasıonar, sondaı-aq 38 jeke medısınalyq mekeme bar, onyń ishinde 7-i memlekettik tapsyrys aıasynda qyzmet kórsetedi. Jalpy aýdannyń emhanalaryna 363 myń turǵyn tirkelgen.
Bıyl birqatar mańyzdy is-sharalar júzege asty. Aqpanda Jetisý-3 shaǵynaýdanynda erekshe qajettiligi bar balalarǵa arnalǵan «Parasat» ońaltý ortalyǵy ashyldy. Jalpy aýdany 1 760 sharshy metr bolatyn jańa ǵımarat zaman talabyna saı jabdyqtarmen qamtylǵan.
Sáýir aıynda Taýgúl-3 shaǵynaýdanyndaǵy №18 emhananyń bólimshesinde jasalǵan kúrdeli jóndeý jumystary aıaqtaldy.
Sonymen qatar, №16 qalalyq emhanany seısmıkalyq turǵydan nyǵaıtý men kúrdeli jóndeý jumystary júrgizilip jatyr, ony 2026 jyldyń naýryz aıynda aıaqtap qalady.
Jaqyn arada №15 emhanany qaıta jańartý men Qýanysh shaǵynaýdanynda aýysymyna 300 adam qabyldaıtyn jańa emhananyń qurylysy jobasyn ázirleý josparlanǵan (memlekettik saraptama – 2026 jyldyń mamyry).
Budan bólek, osy jyldyń qarasha aıynda №2 Qalalyq balalar klınıkalyq aýrýhanasynyń aýmaǵynda jańa korpýstyń qurylysy bastalady. Eski ǵımarat buzylyp, onyń ornyna jalpy aýdany 11,7 myń sharshy metr bolatyn, 67 tósektik jertólesi bar jańa úsh qabatty korpýs salynbaq.
«Aýdanda medısınany damytý – basty basymdyqtyń biri. Ár turǵyn úıiniń janynan sapaly medısınalyq kómek ala alýy úshin jumys istep jatyrmyz», - dedi Abzal Egemberdıev.
Júzege asyp jatqan jobalardyń arqasynda aldaǵy jyldary Áýezov aýdanynyń turǵyndary densaýlyq saqtaý salasyndaǵy istelgen osy jumystardyń ıgiligin kóre bastaıdy.