Áýezov aýdanynda 35 myńǵa jýyq buta egilip, «Halyq qatysatyn búdjet» baǵdarlamasy aıasynda ondaǵan aýla jańartylmaq.
Óńirlik komýnıkasıalar qyzmetinde ótken baspasóz konferensıasynda Áýezov aýdanynyń ákimi Abzal Egemberdıev osylaı dedi. Onyń aıtýynsha, aýdanda tórt qoǵamdyq keńistikti abattandyrý jumysy aıaqtalyp qalǵan.
– Aqsaı-4 shaǵynaýdanyndaǵy alańqaı,
– 12-shaǵynaýdandaǵy alańqaı,
– Mamyr-3 pen Jetisý-3 shaǵynaýdanyndaǵy jaıaý júrginshiler aımaǵy.
Bul aýmaqtarda jańadan balalar men sport alańdary, demalys aımaqtary, tynyǵatyn oryndar men jaryqtandyrý júıesi ornatylyp jatyr.
«Saıran shaǵynaýdanyn abattandyrý jobasyna erekshe nazar aýdarylǵan. Munda «qasbetten qasbetke deıin» qaǵıdaty boıynsha 44 turǵyn úı men aýlanyń ishki joldaryn qosa alǵanda, búkil aýmaq jańartylmaq. Qazir jumystyń 95%-y bitti», - deıdi aýdan ákimi Abzal Egemberdıev.
Ákimniń aıtýynsha, 2026 jyldyń ekinshi toqsanynda Jubanov kóshesin abattandyrý jumysy da aıaqtalmaq. Joba aıasynda demalys jáne sport aımaqtary, balalardyń oıyn alańy, beıne kameralar, shamdar men qoqys jáshikteri ornatylyp, jaıaý jáne avtoturaq aımaqtary retke keltiriledi.
«Halyq qatysatyn búdjet» boıynsha bıyl 30 joba júzege asady. Onyń 22-si – qoǵamdyq keńistikti, 8-i – aýla aýmaǵyn abattandyrýǵa baǵyttalǵan.
Aýlalardyń jaǵdaıyn jaqsartý maqsatynda qarasha aıynyń sońyna deıin 23 aýlada kúrdeli jóndeý jumysy aıaqtalady. Sonymen qatar, 97 aýlada aǵymdaǵy jóndeý júrgizildi.
Budan bólek, qarasha aıynyń sońyna deıin magıstraldy kósheler boıyna 35 myńnan astam buta (deren, úrmeshóp, raýshan rýgoza men bóriqaraqat) jáne 400-ge jýyq úlken aǵash egý josparlanyp otyr. Negizinen Saıyn kóshesiniń boıy kógaldanady.
Aýdan aýmaǵynda 41 myńnan astam jasyl jelek kesilip, 12 myń aǵash butalyp, 2,5 myńnan astam aǵashty kesý jumysy júrgizildi.