Oqýshy oryndarynyń tapshylyǵyn azaıtý maqsatynda aýdanda 2022 jylǵa 1 mektepti ashý, 3 mektepti keńeıtý jáne 2 jańa mektepti jobalaý josparlanǵan.
Bıylǵy maýsym aıynda 4-shi shaǵynaýdanda 400 oryndyq «Dostyq» jeke mektebi ashyldy, dep habarlaıdy Almaty-akshamy.kz.
Bul týraly búgin Almaty qalasynyń ákimi Erbolat Dosaevtyń Áýezov aýdany turǵyndarymen ótken kezdesýinde aıtyldy.
Qala basshysynyń aıtýynsha, 1 qyrkúıekke qaraı №117 mektepke 900 oryndyq jáne №132 mektepke 825 oryndyq 2 japsarjaı paıdalanýǵa beriledi.
«Áleýmettik jaýapkershilik sheńberinde qurylys salýshy Everest Development jyldyń sońyna deıin 400 oryndyq №104 mektepke 2-shi shaǵynaýdanda qosymsha qurylys salýǵa jobalaý-smetalyq qujattama ázirleýdi josparlap otyr. Qurylys-montajdaý jumystary 2023 jylǵa josparlanǵan», - dedi qala ákimi.
Salynyp jatqan «City plus» jáne «Belkamıt» turǵyn úı keshenderiniń janynda qurylys salýshy "Qazaqstroı" 1 500 oryndyq 2 jańa mektep jáne 800 oryndyq 2 balabaqsha salýdy josparlap otyr.
«City plus» kesheniniń janynda 600 oryndyq mektep jáne 300 oryndyq balabaqsha salý úshin ákimdik jer ýchaskesin alyp qoıýdy júrgizýde.
«900 oryndyq ekinshi mektep pen 500 oryndyq balabaqsha qurylysy boıynsha qurylys salýshy burynǵy «Belkamıt» zaýyty aýmaǵynyń bir bóligin satyp alýǵa áreket jasaýda. Osy tórt bilim berý nysany boıynsha jobalaý-smetalyq qujattamany kelesi jyldyń İ jartyjyldyǵynda ázirlep, al qurylysty 2023 jyldyń İİ jartyjyldyǵynda bastap, 2024 jyly paıdalanýǵa berý josparlanýda», - dedi qala basshysy Erbolat Dosaev.