Naryqta jeldetkish pen aýa baptaǵyshtar qymbattaǵan. Sebebi suranys bar jerde baǵanyń da sharyqtaıtyny belgili.
Aýa baptaǵyshtardyń barlyǵy derlik kórshi Qytaıda qurastyrylady. Brend úlgileri san túrli bolǵanymen, fýnksıonaldyq turǵyda bir-birinen aıtarlyqtaı aıyrmashylyǵy joq, dep habarlaıdy Almaty-akshamy.kz 24.kz-ke silteme jasap.
Páterińiz ben keńseńizdiń keńdigine qaraı júıeniń qýattysyn tańdap beredi. Kartına pishindi dızaınerlik úlgilerine deıin bar. Biraq olardyń baǵasy jarty mln teńgeden bastalady.
Temirlan Arınov, satýshy:
– Úıinde balasy nemese qarıasy bar otbasyly adamdar jıi keledi. Qazir ystyq aýa raıynda tynysy tarylyp júrgen azamat kóp. Barlyq klıenttiń ótinishi men suranysyn tyńdap, ózderine yńǵaılysyn kórsetemiz. Kóbi sapaǵa jáne dybysynyń tynyshtyǵyna mán beredi.
Jeldetkish – qan qysymy joǵary jandarǵa taptyrmas qural. Óıtkeni olar jaz aılarynda kóleńkeden shyǵa almaı biraz ábigerge túsedi. Bul jaǵdaıǵa atústi qaraýǵa bolmaıdy. Sebebi densaýlyqqa, tipti ómirge qaýip tóndiredi. Taǵy syrttan ishke terlep kirý, artynsha birden kondısıoner qosý nemese qurylǵynyń ishki súzgishin ýaqtyly tazartpaý – túrli dertke ákelýi múmkin. Muny kópshilik bile bermeıdi. Bul rette dárigerler turǵyndardy kútinip júrýge shaqyrady.
Rozalıa Latypova, otolarıngolog-dáriger:
– Keshe kabınetime 4 qyz kelip, kondısıoner kesirinen sýyqtap qalǵanyn aıtty. Jutyna almaı tamaqtaryn ustap shaǵymdandy. Teksere kele, olarǵa ózge adamnan angına juqqany anyqtaldy. Bul jerde kondısıonerdiń qatysy shamaly. Onyń sýyǵyna aýyryp qala beretin adamdardyń ádette ımýnıteti álsiz keledi. Aǵzasynan tolyq shyǵa qoımaǵan dertti jeldetkish qozdyryp jiberetini ras. Sondyqtan saqtaný kerek.
Kondısıonerdi tym uzaq jáne durys paıdalanbaǵan kezde ishine shań-tozań jınalyp, mıkrobtar men bakterıalar paıda bolady. Saldarynan fıltri men ishki qabyrǵalary kógerip ketedi. Mundaı kezde qurylǵyny shuǵyl servıstik ortalyqtarǵa tapsyrǵan jón ekenin eskertemiz. Negizi tazartý jáne ishindegi frıon suıyqtyǵyn aýystyrý jylyna bir márte júrgizilýi kerek.