İrgetasy qalanǵanyna on jyl da bolmaǵan úlken úıdiń qazir tas-talqany shyqqan
Segiz jyl otasqan erli-zaıyptylar dám-tuzy jaraspaı ajyrasqan. Sot múlikterin teńdeı bólip bergen, dep habarlaıdy Almaty-akshamy.kz.
Atyraýlyq Aınur Qanatova balalarymen týystarynyń úıin panalap júr. Ótken jyly joldasymen zań júzinde ajyrasyp, sot múlikterin teńdeı bólip bergen. Biraq kúıeýi sottyń sheshimine qaramaı, balalaryna da qımaı, jyldar boıy qabyrǵasyn birge qalaǵan baspanasyn traktormen kúrep tastapty. İrgetasy qalanǵanyna on jyl da bolmaǵan úlken úıdiń qazir tas-talqany shyqqan. Tipti aýladaǵy shaǵyn úı men garajdy da qıratyp tastaǵan. Ókinishten óksip jylaǵan kelinshek bul jaǵdaı ótken jyly bolǵanyn, buzyp bastaǵanda polısıaǵa da habarlaǵanyn aıtady. Kúıeýi sottyń sheshimi shyǵysymen úıdi buzýǵa jumysshylar jaldaǵan. Súrip tastamas buryn úıdiń shatyry men esik-terezesin sheship alypty, delingen KTK telearnasynyń sújetinde.
«Úıdi buzyp jatqanymyzǵa tórt kún boldy deıdi. Masqara ǵoı. 14-i kúni sottyń sheshimi shyǵady. Sot sheshimine de, eshnársege qaramaıdy. Bul ne qylǵan bassyzdyq! Atyraýda, Atyraý oblysynda zań bar ma? Men qazir kishkentaı balalarymmen týysqandarymnyń úıin panalap júrgenime jyl jarym boldy»,-deıdi Aınur Qanatova.
38 jastaǵy kelinshektiń aıtýynsha, osydan segiz jyl buryn bir balasymen ózinen 18 jas úlken azamatqa turmysqa shyqqan. Ol kúıeýinen qazir eki uly bar. Otbasylyq aıqaı-shý úlken ulyn jaqtyrmaýdan bastalypty. Ata-anasy tiri kezde uly solardyń qolynda bolǵan. Keıin anasy qaıtys bolyp, óz qolyna alǵan. Kúıeýi ulyn baýyryna baspaq túgili, boqtap-balaǵattap, qysym kórsetipti. Tipti buryn polısıada qyzmet atqarǵan qaıyn inisi ózine kúsh kórsetkende úıden ketýge májbúr bolǵan.
«Qoryqqannan májbúr boldym. Kettim, úsh balamen. Sharbaqqa qaınym keldi. Buryn ishki ister qyzmetkeri bolǵan. Polısıada istegen. Sharbaqtyń ishinde meni jerge qulatyp, keýdemnen tizesimen basyp aldy. Úlken ulymnyń telefonyn tartyp alǵan. Sebebi telefonda balamdy balaǵattaǵan, aýyr sózder aıtqan jazbalar bar edi. Sony qurtý kerek boldy»,-deıdi Aınur Qanatova.
Úıin kúrep tastaǵan azamatty da tyńdap kórmekshi bolyp habarlasqan edik, alaıda ol jaýap berýden bas tartty. Al onyń bul áreketin qazir tártip saqshylary tekserip jatyr.
«QR QK 389-babynyń 1-bóligimen ózinshe bılik faktisimen sotqa deıin tergep-tekserý júrgizilýde. Tergeptekserý 2022 jyldyń 19 sáýirinde bastaldy. Qazir qylmystyq is tergeý satysynda»,-dedi Atyraý oblysy PD anyqtaý basqarmasynyń aǵa anyqtaýshysy Eldos Tuqpatov.
Qazir Aınur eki ulymen aýlaǵa da kire almaıdy. Qıraǵan shańyraqtaryn qaqpanyń syrtynan qarap júr. Ol quzyrly organdar ádil tergeý júrgizip, ana men bala quqyǵyn qorǵasa eken dep tileıdi.