Atyraý munaı óńdeý zaýytynyń janar-jaǵarmaı shyǵaratyn negizgi jelisi jumysyn toqtatty. Oǵan sebep, kásiporynda óndirilgen suıyltylǵan gazdy ózge óńirlerge tasymaldaýda kidiris paıda bolǵan, dep habarlaıdy Almaty-akshamy.kz «Habar 24» silteme jasap.
Sonyń saldarynan qoımada bos oryn joq. Qazir gaz saqtaý parkinde 800 tonna ónim jınalyp tur.
Parktiń syıymdylyǵy – 810 tonna ǵana. Sol sebepti munaı óńdeý zaýyty 10 qańtardan bastap katalıtıkalyq krekıng qondyrǵysynyń jáne oǵan qatysty tehnologıalyq nysandardyń jumysyn amalsyz shektep otyr.
Birqatar tehnologıalyq qondyrǵynyń toqtaýy zaýyt óndiretin basqa ónimderdiń shyǵýyna da qol baılaý bolyp tur. Atap aıtqanda, suıyltylǵan kómirsýtegi gazy táýligine 500 tonnadan 20 tonnaǵa deıin, avtobenzın 6000 tonnadan 1 500 tonnaǵa deıin, al dızeldi otyn táýligine 4 000 tonnadan 2 000 tonnaǵa deıin azaıdy.