Qazaqstan ınternet qaýymdastyǵynyń basshysy Shavkat Sabırov «Facebook» paraqshasynda «mediametrics.kz» servısiniń ındıkatorlary arqyly jelilik BAQ pen áleýmettik jelilerdegi aqparat aǵynyn baqylaý nátıjelerin jarıalady.
«Ár 5 sekýnd saıyn biz 1500-den astam onlaın BAQ-tan málimetter alamyz. Atom elektr stansıasyn salý jónindegi referendým taqyryby boıynsha Qazaqstannyń aqparattyq órisin taldadyq», – delingen jazbada.
Sh. Sabırov 16-22 qyrkúıek aralyǵynda júrgizilgen aptalyq monıtorıń nátıjelerin usyndy. Taldaýǵa «atomdyq elektr stansıasy», «energıa tapshylyǵy», «atomdyq energıa», «beıbit atom», «ıadrolyq reaktor», «referendým», «Úlken aýyly» sıaqty izdeý kilt sózderi qoldanylǵan.
Servıs nátıjesinde jelilik BAQ-ta 3 myńnan astam jarıalanym tirkelip, olardyń 80%-y beıtarap, 18%-y oń, al 2%-y teris sıpatta bolǵan.
Áleýmettik jelilerde kórsetkishter áldeqaıda joǵary: 80 myńnan astam eskertpe tirkelip, olardyń 82%-y beıtarap, 16%-y oń, al 2%-y teris bolǵan.
Avtor jarıalanymda ınternettegi BAQ-ta talqylanatyn negizgi taqyryptardy atap kórsetti:
- Elektr energıasynyń tapshylyǵy;
- AES jumysynyń senimdiligi men qaýipsizdigi;
- Eldiń energetıkalyq qajettilikterin qanaǵattandyrý (orta jáne uzaq merzimdi perspektıvada);
- Ekonomıkanyń, ǵylymnyń damýyna jáne azamattardyń ómir súrý sapasyn jaqsartýǵa áser etý;
- Ekonomıkalyq ósý úshin eldiń energetıkalyq áleýetin arttyrý;
- «Atom energetıkasynyń» jańa salasyn qalyptastyrý jáne qurý;
- Iadrolyq medısınanyń damýy.
Zertteý nátıjesinde Sh. Sabırov AES taqyryby men Respýblıkalyq shtab qyzmetiniń keńinen qamtylǵanyn (ınternettegi BAQ-ta aıtylǵandardyń 30%-dan astamy), sondaı-aq sarapshylar, qoǵam belsendileri, depýtattar men belgili tulǵalardyń ıadrolyq energetıkany qoldaýdaǵy belsendiligin atap ótti. Sonymen qatar, basqa taqyryptar arasynda armıa reformasy, quqyq qorǵaý organdaryndaǵy ózgerister, bankterdiń problemalary jáne sýısıd máseleleri de talqylanǵan.