Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
Atletter Olımpıadaǵa barmaıdy
1996 jyldan beri barlyq Olımpıadaǵa qatysqan atletter Parıjge joldama ala almady. Aýyr atletıkadan Qazaqstan quramasy alǵash ret Olımpıada oıyndaryna qatyspaıdy. Qazaqstandyq aýyr atletter Parıjde ótetin Olımpıada oıyndaryna joldama ıelene almady.
Jalǵan sóz jarǵa jyqty
«Jańaózende jol jabyldy» dep alańdaýshylyq sıpatta jalǵan aqparatty áleýmettik jeli arqyly taratqan jańaózendik jazalandy. Ol QR ákimshilik quqyq buzýshylyq týraly kodeksiniń 456 babynyń 3 bóligine saı ákimshilik jaýapkershilikke tartylyp otyr.
Budan buryn memleket basshysy Toqaev buqaralyq aqparat quraldaryna, belsendi azamattarǵa jáne blogerlerge jurtty dúrbeleńge salatyn jalǵan aqparattardy taratpaý qajet ekenin aıtqan bolatyn.
Eńbekmın ótemaqy tólemeıdi
QR Eńbek jáne halyqty áleýmettik qorǵaý mınıstrligi sý tasqynynan zardap shekkenderge ótemaqy tóleıtini týraly messendjerler men áleýmettik jelilerde taratylyp jatqan aqparat shyndyqqa janaspaıdy.
Memleket basshysynyń tapsyrmasyna sáıkes sý tasqynynan zardap shekken qazaqstandyqtarǵa jergilikti atqarýshy organdar birjolǵy tólem túrinde kómek kórsetedi. Olardyń mólsheri ár óńirde keltirilgen materıaldyq zalaldy esepteý úshin qurylǵan arnaıy komısıalardyń sheshimi boıynsha jeke-jeke belgilenetin bolady.
Muhıtty da lastadyq
Avstralıa men Kanada ǵalymdary álemdik muhıt túbine shókken plasık mólsherin eseptedi. Ǵalymdardyń esebinshe, muhıt túbine 11 mln tonnaǵa deıin plasık shókken. Olardyń jartysy tuńǵıyqta jatyr. Bul zertteý óz kezeginde plasıkpen lastanýdyń saldarymen kúresýge ári onyń qorshaǵan ortaǵa zıanyn anyqtaýǵa kómektesýi múmkin.
3 745 jer úı sý astynda qaldy
TJM Azamattyq qorǵanys jáne áskerı bólimder komıtetiniń aǵa ofıseri Erasyl Saıpashtyń aıtýynsha, sý tasqyny bastalǵaly beri 75 982 adam, onyń ishinde 18 681 bala qutqarylǵan. Tartylǵan áýe kemeleriniń kómegimen 2 811 adam, onyń ishinde 865 bala qutqaryldy. Ýaqytsha ornalasý pýnktterine 7 myńnan astam adam, onyń ishinde 2 794 bala ornalastyryldy. 69 971 janýar qaýipsizdik jerge aıdaldy. Zardap shekken óńirlerge 126 tonna gýmanıtarlyq kómek jetkizildi. Birlesken kúshtermen 7,7 mln astam tekshe metr erigen qar sýy soryldy. 993 myń qapshyq jáne 982 myń tonna ınertti materıal tóseldi. 1 739 turǵyn úı men 1 743 aýla aýmaǵynan sý buryldy.
Almatydan Atyraýǵa kómek jiberildi
Keshe Atyraý oblysynda sý tasqynyna baılanysty tabıǵı sıpattaǵy tótenshe jaǵdaı rejımi jarıalandy. Zardap shekken aımaqqa Almaty qalasy ákimi apparatynyń qutqarý qyzmetiniń kúshimen gýmanıtarlyq kómek jiberildi.
29 naýryzdan bastap qalada Almaly aýdanynyń komýnaldyq ortalyǵy bazasynda ashylǵan qabyldaý pýnkti jumys isteıdi. Kún saıyn almatylyqtar qajetti zattardy ákelip, tabıǵı apattan zardap shekken óńirlerge kómek kórsetýge úlesterin qosty. Qala turǵyndary, kásipkerler, jastar qajetti kómekti jınaýǵa belsene qatysty. 6 kúnde 10 tonnaǵa jýyq gýmanıtarlyq kómek jınaldy.
2 000 000 teńgelik kostúm
Almaty qalasynda «DAULETTEN qaıyrymdylyq qory» uıymdastyrǵan qaıyrymdylyq keshte Dımash Qudaıbergenniń kostúmi aýksıonda 2 000 000 teńgege satyldy.
Bul kostúmdi tanymal ánshi Alla Pýgachevanyń Máskeýde ótken mereıtoıyna oraı uıymdastyrylǵan «Podarok dlá Anny» atty shyǵarmashylyq keshinde kıgen. Onda Dımash Igor Krýtoıdyń «Lúbov, pohojaıa na son» ánin oryndady. Kostúmniń dızaıneri – Atelier Leka. 2 000 000 teńgelik kostúmdi qazaqstandyq kásipker, qarjylyq saýattylyq boıynsha mentor Erkebulan Áripbaı satyp aldy.
«Almaty – bizdiń ortaq úıimiz»
Búgin qalamyzda osyndaı atpen naýqan bastaldy. 8 sáýir men 8 mamyr aralyǵynda ótetin naýqanǵa Almatynyń árbir turǵyny men qonaǵy qatysa alady.
«Almaty – bizdiń ortaq úıimiz» naýqanynyń basty maqsaty – qalalyq ınfraqurylymǵa uqypty qaraý qundylyǵyn qalyptastyrý, halyq arasynda joǵary azamattyq jaýapkershilik pen ekologıalyq mádenıetti tárbıeleý, jeke ekologıalyq bastamalardy qoldaý men iske asyrýǵa jaǵdaı jasaý.