Almaty qalasynyń QAJ departamentine qarasty №11 mekemede Konstıtýsıa kúnine arnalǵan «Ata zańym aıalaıdy elimdi» atty mádenı is-shara ótti.
İs-sharany balalar kolonıasynyń ókilderi Jambyl atyndaǵy qalalyq jasóspirimder kitaphanasynyń qyzmetkerleri Sanjar Seısenbaev jáne Aıda Nurhanovamen birlesip ótkizdi.
— Maqsat - bas bostandyǵynan aıyrylǵan jazaly jasóspirimderge elimizdiń Ata zańy jóninde mol maǵlumat berý, olarǵa zań aldyndaǵy jaýapkershilikti sezinýine kómektesý, sondaı-aq, eshteńe de kesh emes, áli de túzelýge múmkindik baryn, ol úshin qoǵam da qoldaý kórsetýge qashanda ázir ekenin, degenmen adam aldymen ózi jaqsylyqqa umtylýy qajettigin uǵyndyrý, - deıdi mekemeniń jasaq bastyǵy, ádilet aǵa leıtenanty Damır Erkeshov.
Sanjar Seısenbaev Konstıtýsıanyń tarıhynan bastap, búgingi bet-beınesi týraly taǵlymdy baıandama jasady. Al jazaly jasópirimder Ata zań qurmetine óleń shýmaqtaryn arnady.
Aıda Nurhanova elder men jer-sý týraly qyzyqty málimetterden quralǵan vıktorınalyq suraqtar qoıyp, jastardyń bilimin ashatyn qyzyqty oıyn ótkizdi.
Merekeniń sońy Jambyl atyndaǵy qalalyq jasóspirimder kitaphanasynyń qyzmetkerleri daıyndaǵan «Ata zańym aıalaıdy elimdi!» atty jańa kitap kórmesin tamashalaýmen aıaqtaldy.