Uıymdastyrýshylar shet elderden kelgen asyqshylarǵa qazaqtyń ulttyq oıynyna degen qyzyǵýshylaqtary úshin rızashylyq bildirdi, dep habarlaıdy almaty-akshamy.kz.
Búgin Astana qalasyndaǵy «Aspan» sport kesheninde Asyq atý sportynan Gran-Prı «Azıa asyǵy» halyqaralyq týrnıri bastaldy. Elimizdiń Táýelsizdik kúnine arnalǵan dúbirli dodada Pákistan, Úndistan, Qytaı, Mońǵolıa, Ózbekstan, Qyrǵyzstan jáne Qazaqstan quramalary ózara baq synasady. Jarys jekeleı synda ótetin bolǵandyqtan naǵyz úzdikter bas qosyp, erler men áıelder arasynda kim myqtyny anyqtaıdy
Dástúrli týrnırdi Ulttyq sport túrleri qaýymdastyǵynyń bas hatshysy Tastanbek Esentaev óziniń quttyqtaý sózimen ashyp, qatysýshylarǵa sáttilik tiledi. Sondaı-aq ardager asyqshy Áset Ramazanov pen QR Asyq atý federasıasynyń atqarýshy dırektory Jomart Sabyrjanov ulttyq sportymyzdyń mańyzdylyǵy týrasynda sóz qozǵap, shet elderden kelgen asyqshylarǵa qazaqtyń ulttyq oıynyna degen qyzyǵýshylaqtary úshin rızashylyq bildirdi.
Týrnır úsh kúnge jalǵasady. Jeńimpazdar men júldegerler QR Asyq atý federasıasynyń dıplom, medaldarymen jáne qarjylaı syılyqtarmen marapattalady. Atap aıtar bolsaq, oza shaýyp, birinshi oryn ıelengender 150 myń teńge, ekinshi oryn jeńimpazdary úshin 100 myń teńge jáne úshinshi oryn alǵan eki birdeı asyqshynyń árqaısysy 50 myń teńgeden qarjylaı marapatqa qol jetkizedi