Astanada et ónimderin satatyn saýda nysandaryn tekserý barysynda shyǵý tegi belgisiz 6 tonnadan astam et aınalymnan alyndy, dep habarlaıdy Aqshamnews tilshisi İİM baspasóz qyzmetine silteme jasap.
Vedomstvo habarlaýynsha, veterınarlyq ınspeksıamen birge júrgizilgen reıd kezinde et ónimderiniń qujattary men sanıtarlyq talaptarǵa sáıkestigi tekserilgen. Tekserý nátıjesinde sapasy belgisiz úlken kólemdegi et anyqtalyp, veterınarlyq ınspeksıaǵa jiberildi.
Qalalyq bazarlar men resmı et óńdeý kásiporyndary da baqylaýdan ótti. Reıd barysynda sanıtarlyq normalardy óreskel buzǵan tórt jerasty sehy anyqtaldy. Ondaǵy kúmándi ónimder tárkilenip, atalǵan faktiler boıynsha tekserýler jalǵasyp jatyr.
İİM málimetinshe, aýyl sharýashylyǵy janýarlaryn esepke alý men sáıkestendirý isine erekshe kóńil bólingen. Stasıonarlyq beketter men joldarda mal jáne et tasymaldaǵan 200-den astam kólik tekserilgen.
Sonymen qatar, polısıa qyzmetkerleri jeke sektorlardy da aralap, úı janýarlary men mal ustaýshylardan qajetti qujattar men veterınarlyq anyqtamalardy talap etken.