Týrnırge túrli memleketten 400-ge jýyq sportshy qatysyp jatyr.
Astanada erkin, grek-rım jáne áıelder kúresinen Azıa chempıonaty bastaldy, -dep habarlaıdy Almaty-akshamy.kz Azattyq Ruhy-na silteme jasap.
Týrnırge elimizben qatar Qytaı, Japonıa, Úndistan, Mońǵolıa, Iran, Ońtústik Koreıa jáne taǵy da basqa 22 memleketten 400-ge jýyq sportshy qatysyp jatyr.
Mádenıet jáne sport mınıstri Asqat Oralovtyń habarlaýynsha, qazaqstandyq jáne sheteldik palýandardy qoldaýǵa kelgen júzdegen jankúıer Jaqsylyq Úshkempirov atyndaǵy jekpe-jek saraıynyń trıbýnalaryn toltyrdy. Chempıonattyń ashylý saltanatyna sondaı-aq Birikken kúres áleminiń (UWW) vıse-prezıdenti Ahroljon Rýzıev, sondaı-aq UWW Asia jáne QR grek-rım, erkin jáne áıelder kúresi federasıasynyń prezıdenti Dáýlet Turlyhanov qatysty.
«Chempıonattyń saltanatty ashylýynan keıin men bizdiń quramanyń jattyǵýyn kórip, sportshylarymyzben kezdestim. Sonymen qatar týrnır júldegerlerin marapattadym. Atap aıtqanda, búgin grek-rım kúresinen bes salmaq dárejesi boıynsha júldegerler anyqtaldy.
Bizdiń elimizde kúrestiń qaı túri bolsyn eń tanymal sport túrleriniń biri sanalady jáne osy deńgeıdegi jarystar onyń damýyna odan ári yqpal etedi. Óz kezeginde, Memleket basshysy men bizdiń mınıstrlik jastar men kásibı sportshylar úshin kúrespen aınalysýǵa barlyq jaǵdaıdy jasaıdy. Jańadan úıirmeler, zaldar ashyp, túrli týrnırler ótkizetin bolady. Solardyń biri – elordada tórinde ótip jatqan osy Azıa birinshiligi. Elimizdiń palýandaryna Azıa chempıonatynda joǵary deńgeıde óner kórsetip, jeńis tuǵyryna kóterilýdi tileımin», - dep jazdy Asqat Oralov.