Nur-Sultan qalasyndaǵy №2 kópbeıindi balalar aýrýhanasynda alǵash ret kapsýlanyń kómegimen balanyń asqazan-ishek joldaryna dıagnostıkasy jasaldy. Bul týraly atalǵan aýrýhananyń hırýrgıa qyzmetiniń jetekshisi Rınat Baıgereev málim etti, dep habarlaıdy Almaty-akshamy.kz QazAqparat-qa silteme jasap.
«Kúni keshe ǵana respýblıka tarıhynda alǵash ret biz derbes kapsýla endoskopıasyn júrgizdik. Bul dıagnostıkalyq ádis. Iaǵnı adam kapsýlany jutady, sol arqyly biz asqazan-ishek joldaryna qatysty málimetterdi bile alamyz. Bizdiń aýrýhanaǵa asqazan-ishek jolynan qan ketetin pasıent keldi. Sonymen qatar atalǵan kapsýla gastroskopıa asqazan-ishek jolynyń joǵarǵy jáne kolonoskopıa tómengi bólimdi tekserýge múmkindik berip otyr. Odan bólek, asqazan-ishek joldary boıynsha qoljetimsiz jerlerdi tekserip, dıagnostıka júrgizýge bolady. Dıagnostıkanyń qorytyndysy boıynsha pasıentke ota jasaýǵa qatysty sheshim qabyldanady. Osylaısha kapsýlalyq endoskopıa ádisiniń kómegimen biz tolyq kórinisti aldyq. Nátıjesinde balaǵa ota jasaýdyń qajeti joq boldy»,- dedi Rınat Baıgereev BAQ ókilderine arnalǵan baspasóz týry barysynda.
Onyń aıtýynsha, atalǵan medısınalyq ádis álem boıynsha alǵash 2013 jyly qolǵa alyndy.
«Osy ýaqytqa deıin kapsýla dıagnostıkasy kóptegen elderde qoljetimsiz boldy, sebebi bul qymbat prosedýra. Endigi ýaqytta hırýrgtar kapsýlalyq endoskopıa ádisin qoldanýdy josparlap otyr», - deıdi ol.
Aıta ketsek, №2 kópbeıindi qalalyq aýrýhanada elorda boıynsha balalarǵa arnalǵan jalǵyz hırýrgıalyq stasıonar ornalasqan. Tek bir jyldyń ishinde MÁMS júıesi aıasynda hırýrgıalyq bólimsheniń qabyldaý bólimine 26 myń bala júgindi. Hırýrgıalyq stasıonarda onkologıa, kardıologıa jáne kardıohırýrgıadan basqa beıindi 10 hırýrgıalyq bólimshe bar.