Astanada polısıa maıory "jigitine kórsetken qamqorlyǵy úshin" 4 jylǵa sottaldy, - dep habarlaıdy Aqshamnews.kz tilshisi Azattyq Rýhy-na silteme jasap.
Astana qalasynyń qylmystyq ister jónindegi aýdanaralyq soty polısıa maıory Aıdana Qalybaıdy qyzmettik ókilettigin teris paıdalanǵany úshin kináli dep tanyp, 4 jylǵa bas bostandyǵynan aıyrdy. Sonymen birge oǵan memlekettik qyzmette laýazym ıelený quqyǵyna ómir boıyna tyıym salyndy.
Maıor ne búldirdi?
Aıdana Qalybaı ishki ister organdarynda 2013 jyldan beri jumys istegen. Burynǵy suhbattarynda ol bala kezinen polısıa qyzmetkeri bolýdy armandap, jeti jylda kapıtan shenine deıin kóterilgenin maqtanyshpen aıtqan edi. Keıin maıor ataǵyn alǵan.
Sot derekterine sáıkes, Qalybaı ákimshilik polısıada qyzmet atqara júrip, jol erejesin buzǵandarǵa salynǵan aıyppuldardy zańsyz túrde basqa azamattardyń atyna aýdaryp otyrǵan. Bul áreketteri memleketke 3,6 mln teńgeden astam zalal keltirgen. Qylmystyq is boıynsha 10 adam jábirlenýshi dep tanyldy.
Sot sheshimi ne deıdi?
Sot sheshimimen Qalybaıdan memleket kirisine 408 myń teńgeden astam sot shyǵyny jáne Jábirlenýshilerge ótemaqy tóleý qoryna 69 myń teńge óndirildi.
Sottalýshynyń jalǵyzbasty ana ekeni eskerilip, jazasyn óteý merzimi 2029 jyldyń 23 tamyzyna deıin shegerildi. Osy ýaqytqa deıin ol úıqamaqta bolady. Eger qoǵamdyq tártipti buzsa nemese qadaǵalaý organynyń eskertýlerine qulaq aspasa, jazasyn óteý úshin qamaýǵa jiberiledi.
Aıdana Qalybaı buǵan deıin polısıada joǵary shenge jetip, zeınetke deıin qyzmet etýdi armandaǵan. Alaıda sot úkimine sáıkes, ol "polısıa maıory" arnaıy ataǵynan aıyryldy.
Qazirgi ýaqytta onyń isine baılanysty qosymsha tekserýler men suraýlar júrgizilip jatyr.