Elordada elimizdiń bas qalasynyń 25 jyldyǵyna arnalǵan «Astana –mádenıet kerýeni» áskerı orkestrleriniń I Halyqaralyq áskerı-mýzykalyq festıvali ótip jatyr, dep habarlaıdy Almaty-akshamy.kz QR Qorǵanys mınıstrliginiń baspasóz qyzmetine silteme jasap.
Mereke kúni Esil jaǵalaýyndaǵy jazǵy amfıteatr sahnasynda Ázerbaıjan, Úndistan, Qytaı, Reseı, Túrkıa, Ózbekstan jáne Japonıanyń áskerı mýzykalyq ujymdarynyń ónerin pash etken Band Marathon ótti.
Festıválde Qarýly kúshterdiń Ulttyq áskerı-patrıottyq ortalyǵynyń Ortalyq áskerı orkestri, Memlekettik kúzet qyzmetiniń Prezıdenttik orkestri jáne Ulttyq ulannyń úlgili-kórsetilimdi orkestri qatysady.
Jınalǵandarǵa arnap Qorǵanys mınıstriniń orynbasary general-leıtenant Sultan Kamaletdınov sóz sóıledi. Ol qala turǵyndary men qonaqtaryn Astana kúnimen quttyqtap, mýzykanttarǵa osyndaı aýqymdy sharaǵa qatysqany úshin rızashylyǵyn jetkizdi.
– Bizdiń halyqaralyq áskerı orkestrler festıvali bul Astana – beıbitshilik pen jasampazdyq qalasy, mádenıet pen halyqtardy bir ortaǵa tartyp, jaqyndastyratyn ortalyq ekeniniń jarqyn dáleli bolmaq. Mundaı erekshe shara yntymaqtastyqty damytýǵa, beıbitshilik pen tatý kórshilik ıdeıalaryn ilgeriletýge yqpal eterine senimdimin, – dep atap ótti ol.
Band Marathon degenimiz qatysýshy toptardyń 20 mınýttyq qoıylymdary. Ázerbaıjandyq mýzykanttar kórermenderge kompozıtor Ýzeır Gadjıbeılıdiń «Djangı», Emın Sabıtoglýdyń «Inja bellım», Alekper Tagıevtiń «Sen gelmez oldýn» jáne bir kezderi aty ańyzǵa aınalǵan Músilim Magomaev oryndaǵan «Jalyndy ólke» ánderin tartý etti.
Qytaı mýzykanttary avtory Chjen Lúıchenniń «Qytaı Halyq-azattyq armıasynyń marshy», Shý Iýngannyń «At jarysy», Van Heshenniń «Sınhaı-Tıbet taýly aımaǵy», Chen Sánniń «Aba Bıkesh», Lı Chan óńdegen «Jastar bıi», Van Sınniń «Otanǵa madaq», Lı Súıhaonyń «Bolattaı berik bólimder marshy» men «Alıshannan kelgen qyz», Go Syda óńdegen «Dýdar men Marıa» týyndylaryn oryndady.
Úndistannyń Áskerı-áýe kúshteriniń orkestri tyńdaýshylardy «Renaissance» Wg Cdr G Jayachandran VSM, «Bombay 1980» Sgt D Mridha, «Dancing Queen» ABBA, «Imagination» Sgt Suneesh Thomas, «Mexican Shuffle» Bert Kaempfert, «Duniya me» Sgt D Mridha jáne «Jai Ho» Sgt NT Singh shyǵarmashylyǵymen kelýshilerdi qýantty.
Japon áskerı orkestri astanalyqtarǵa arnap Naruto Main Theme, Obatala, Hamabe no Uta (Song of the Seashore) jáne Festal Scenes áýenderin oryndady.
Tsuna a wakens, La camisa negra, Kılpıllama, Delilah, Summertime, Horazımcha jáne Go down Moses kompozısıalaryn oryndaǵan Ózbekstannyń Ortalyq áskerı orkestri aspaptarynyń áýezdi únimen jurtty tamsandyrdy.
Reseı Federasıasy Batys áskerı okrýginiń 23-shi áskerı orkestriniń repertýaryndaǵy kóptegen áýender tyńdaýshylarǵa tanys. Mýzykalyq ujym «Lenıngrad marshy», «Orys kompozıtorlarynyń taqyryptaryna arnalǵan popýrrı», «Qyzmettik roman» kınofılmindegi «Ýtro», «Adam amfıbıa» kınofılmindegi «Pesenka o morskom dávole», «Sınáá vechnost, «Chertovo koleso» men Seıdolla Báıterekovtiń «Álıa» ánderin oryndady.
Túrik áskerı orkestri «Mehteran» Kemanı Tatıostyń «Sýzınak Peshrevı», Leıla Sazdyń «Neshıde-ı Zafer marshy», Farýk Gúrtýndjdiń «Mehter Výrýıor», Ismaıl Hakky Beıdiń «Mehterhane-ı Hakanı marshy», Álı Ryza Beıdiń «Ordý marshy», «Húdjým marshy», «Estergon qalasy» jáne «Gench Osman» áýenderin oryndap, kórermenderdi tánti etti.
Bul kúni festıválge qatysýshylar elderdi ózara biriktiretin jáne nyǵaıtatyn sazdy áýen tilinde sóıledi. Ónerde ult joqtyǵyn kórsete otyryp, álemniń biregeı áskerı orkestrleri ulttyq, shyǵarmashylyq jáne armıa dástúrleriniń alýan túrliligin kórermenderge pash etti. Astanalyqtar da orkestrlerdiń qoıylymdaryna qoshemet kórsetip, kóterińki kóńil-kúıin jasyra almady.
