22 qyrkúıek kúni elordanyń Baıqońyr aýdanynda erekshe formattaǵy ekologıalyq baıqaý ótti. "Taza Qazaqstan" aksıasy aıasynda uıymdastyrylǵan shara jas sýretshilerdiń qıaly men jasandy ıntellekttiń múmkindikterin biriktirdi, dep habarlaıdy Aqshamnews.kz.
Jańa ashylǵan skverde ótken baıqaýdy aýdan ákimdigi uıymdastyrdy. Maqsaty – jastardyń ekologıaǵa kózqarasyn zamanaýı tehnologıalar arqyly kórsetý. Qatysýshylar neırojeliler men generatıvti II platformalaryn qoldanyp, ekologıalyq taqyryptaǵy sýretterin jasady.
30-dan astam oqýshy men stýdent qaldyqtardy qaıta óńdeý, balamaly energıa kózderi, tabıǵatty qorǵaý sıaqty ıdeıalardy shyǵarmashylyqpen jetkizdi. Olardyń týyndylarynda bolashaqtyń jasyl qalalary, kún men jel energıasyn paıdalanatyn qurylǵylar, robottandyrylǵan qoqys suryptaýshylar beınelendi.
Uıymdastyrýshylardyń aıtýynsha, bul bastama jastardyń ekologıalyq oılaýyn qalyptastyryp, sıfrlyq saýattylyǵyn arttyrýǵa yqpal etedi. Baıqaý – tehnologıa men tabıǵatqa janashyrlyqty ushtastyrǵan tyń qadam retinde baǵalandy.