Bıyl Almatynyń jastaryn jumyspen qamtý maqsatynda biraz jumys qolǵa alyndy. Jyl basynan beri 21700 jas jumysqa alynsa, olardyń 15700-i turaqty, 6000-y ýaqytsha jumysqa ornalasqan. Sıfrlyq platformalardy damytyp, qysqa merzimdi kýrstardy iske qosyp, mansap jármeńkeleri, komúnıtı-ortalyqtar arqyly qoldaý kórsetip, jumys berýshimen ózara árekettestiktiń jańa formasyn engizý arqyly qala jastardyń jumyspen qamtylyp, qyzmette ósýine yqpal etýge etýge baǵyttalǵan tutas ekojúıe qalyptastyryp jatyr. Óńirlik komýnıkasıalar qyzmetinde Jastar saıasaty basqarmasy basshysynyń orynbasary Almaz Keńesbaı osylaı dedi.
Qazir Almatyda 712,3 myń jas bar. Olardyń 442,3 myńy jumys isteıtinder de, 280,7 myńy – stýdentter, shamamen 80 myńy joǵary synyp oqýshysy. Ekonomıkalyq belsendi jastardyń sany – 472,1 myń adam, onyń ishinde 452,6 myńy jumyspen qamtylǵan. Olardyń 396,7 myńy jaldamaly jumysshylar bolsa, 56 myńy ózin-ózi jumyspen qamtyǵandar.
«NEET-jastardyń úlesi qazirgi ýaqytta 5,8%. Jyl saıyn joǵary oqý oryndaryn shamamen 50 myń adam bitiredi. Olardyń 60–80%-y Almatyda qalyp, osynda jumysqa ornalasýǵa umtylady», – deıdi Almaz Keńesbaı.
Qalalyq karera ortalyǵy - jastardy jumyspen qamtýmen aınalysady. Jyl basynan beri ortalyqqa 5 myńnan astam jas júginipti. 4 myń adam jumysqa ornalasyp, qala aýdandarynda «Karera kúnderi» ótken. İs-sharaǵa 18 myń jas qatysyp, 1,7 myńy jumys tapqan. «Jasyl el» jobasy boıynsha da jaz mezgilinde 2,1 myń stýdent ýaqytsha jumyspen qamtyldy.
Máseleniń sheshilýine JasAlmaty.kz sıfrlyq portaly úlken úles qosty. Bul portal Jobfair365 pen SkillBridge platformasyn qamtıdy. Portalda 3,5 myńnan astam jumys berýshi tirkelgen, 2,1 myńnan astam bos jumys orny bar, qoldanýshylar sany 35 myńnan asty. Osy platforma arqyly 1,8 myń adam jumys tapty. Olardyń 82%-y joǵary bilimdi bolǵanymen, 91%-ynyń tájirıbesi joq, bul bastapqy jumyspen qamtýdyń mańyzdylyǵyn kórsetedi.
SkillBridge baǵdarlamasy aıasynda 61 onlaın kýrs iske qosylyp, 7,2 myń jas bilim aldy. Kýrstan keıin 3,8 myń adam jumysqa ornalasty. Kýrstar sıfrlyq mamandyqtarmen qatar (Digital marketıń, Java Pro, Web-analıtıka), praktıkalyq baǵytty da qamtıdy. Shilde aıynan bastap «Skill All» jobasy – qoldanbaly daǵdylarǵa arnalǵan oflaın oqytý iske qosylyp, 800-den astam adam tálim aldy. Jyl sońyna deıin 2000 adamdy qamtý josparlanǵan. Sonymen qatar, jumysshy mamandyqtary týraly «Qadam» ınsta-serıaly 100 myńnan astam qaralym jınady. Skill All kýrstarynyń atlasy Python-nan bastap SMM jáne ChatGPT-ge deıin 18 baǵyt boıynsha jaryq kórdi.
Almatydaǵy 11 jastar komúnıtı-ortalyǵy jumyspen qamtyp, qoldap, damýǵa septesetin orynǵa aınaldy. Jyl basynan beri bul ortalyqtarǵa 6 myńnan astam jas júgindi: 3,9 myńy jumys máselesi boıynsha, 2,1 myńy – psıhologıalyq jáne quqyqtyq kómek alý úshin. 9 aı ishinde 1,5 myńnan astam is-shara ótkizilip, 200 myńnan astam adam jumysqa ornalasqan.
Sonymen qatar, Almaty qalasynyń Jumyspen qamtý jáne áleýmettik baǵdarlamalar basqarmasymen birlesip, jastardy jumyspen qamtýǵa járdemdesý boıynsha keshendi jumys júrgizilip jatyr.
Atalǵan jumys aıasynda Eńbek mobıldiligi ortalyǵy arqyly turaqty jáne ýaqytsha jumysqa 8,4 myń jas jumysqa ornalasty.
Budan bólek, Almaty qalasynyń Jumyspen qamtý jáne áleýmettik baǵdarlamalar basqarmasy jastardy kásibı baǵyttaý maqsatynda «Mansap kompasy» sıfrlyq platformasyn engizip, damytyp jatyr. Nátıjesinde atalǵan platforma arqyly 3,7 myń adam jumyspen qamtyldy.
Osylaısha, jyl basynan beri jalpy 21,7 myń jas jumysqa turdy. Onyń ishinde 15,7 myńy turaqty, 6 myńy ýaqytsha jumysqa ornalasqan.
Jastardyń jumysqa ornalasýyna kedergi keltiretin máselelerdi sheshý (tájirıbeniń bolmaýy, aqparattyń jetkiliksizdigi, jumys berýshimen baılanystyń joqtyǵy) úshin jańa formattar engizile bastady. Jazda «New Generation Leaders» atty alǵashqy kareralyq olımpıada ótip, oǵan 3 myńnan astam stýdent qatysyp, 70 komanda 350-den astam sheshim ázirledi. Sonyń arqasynda 200 adam jumys taýyp, 700-i biliktiligin jetildirdi.
Sondaı-aq, jumyssyz túlekterdi tirkep, olardy Qalalyq karera ortalyǵyna baǵyttaý úshin call-ortalyq ta quryldy. Jastardy aqparattandyrý maqsatynda MIB jáne PIK-pen (OSI ı KSK) qyrýar jumys istelip jatyr, bul komúnıtı-ortalyqtarǵa keletinder sanyn jylyna 400 myńnan 600 myń adamǵa deıin arttyrýǵa múmkindik bermek.
Jańadan Career Speed Dating formaty da engizildi. Munda jastar ózin tanystyryp, kompanıalar sol jerde ózine kerek mamandy tańdap alady. Ár komúnıtı-ortalyqta 5–10 seriktes jumys berýshi ornalasady. Olar keńes berip, jumysqa alyp, jastardy eńbek naryǵyna beıimdeýge kómektespek.
Ár jastyń aqparat, bilim alyp, jumysqa ornalasýyna múmkindik beretin júıe qalyptastyrý arqyly Almaty jastardy jumyspen qamtýdy qalalyq saıasattaǵy strategıalyq mindetke aınaldyryp otyr.