Bloger Erbolat Janabilov pen onyń jary Elmıra Tólegenovaǵa qatysty is Astanadaǵy ekonomıkalyq tergep-tekserý departamentine joldandy. Sot olardyń áreketterinen qylmystyq quqyqbuzýshylyq belgilerin anyqtady, dep habarlaıdy Aqshamnews.kz tilshisi Tengrinews.kz-ke silteme jasap.
Astana qalasynyń mamandandyrylǵan ákimshilik quqyqbuzýshylyqtar jónindegi aýdanaralyq sotynda blogerlerge qatysty is qaralǵan bolatyn. Búgin sot ákimshilik is júrgizýdi toqtatý jáne materıaldardy qylmystyq is retinde tergeýge berý týraly qaýly shyǵardy.
"Jeke kásipker “Eler” atynan Janabilov Erbolat Nurlybekulyna qatysty istiń materıaldary Astana qalasy boıynsha Ekonomıkalyq tergep-tekserý departamentine joldanady", - dep jarıalady sýdıa Aqerke Bekturǵanova.
Dál osyndaı sheshim blogerdiń jubaıy, Elmıra Tólegenovaǵa qatysty da qabyldandy. Onyń isi Qarjylyq monıtorıń agenttiginiń ekonomıkalyq tergep-tekserý departamentine jiberildi.
Ne jaǵdaı boldy?
Búgin bloger Erbolat Janabilovtyń jubaıy Elmıra Tólegenovaǵa qatysty sot otyrysy ótti. Ol lısenzıasy joq tulǵa retinde zańsyz lotereıa uıymdastyrdy degen aıyppen ákimshilik jaýapkershilikke tartylǵan.
Sotta Qumar oıyndar men lotereıany retteý komıtetiniń ókilderi blogerlerdiń uıymdastyrǵan utystaryn "jaı ǵana búrkemelengen lotereıa" dep atady. Komıtet ókili Abdál Baltategi isti ákimshilik emes, qylmystyq is retinde qaıta saralaýdy usyndy.
Olar kimder?
Erbolat Janabilov pen Elmıra Tólegenova - Qazaqstandaǵy eń tanymal blogerlerdiń biri. Erbolattyń Instagram paraqshasynda 8,4 mıllıon, al Elmıranyń paraqshasyna 7,1 mıllıon adam jazylǵan. Olardyń jazbalary únemi mıllıondaǵan qaralym jınap, uıymdastyratyn utys oıyndary jıi vırýstyq sıpatqa ıe bolady.