Atyraý oblysynda Qarjylyq monıtorıń agenttigi men prokýratýranyń úılestirýimen Biryńǵaı jınaqtaýshy zeınetaqy qorynan (BJZQ) 200 mlrd teńgeden astam qarajatty zańsyz sheshýge qatysy bar qylmystyq top áshkerelendi, dep habarlaıdy Aqshamnews.kz tilshisi.
Tergeý barysynda BJZQ qarjysyn zańsyz ıemdenýge kómektesken 5 uıymdasqan toptyń áreketi anyqtaldy. Olar jalǵan qujattar jasap, Atyraý, Astana, Almaty, Shymkent, Aqtaý jáne ózge de qalalarda bar sıaqty etip 30-dan astam jalǵan stomatologıalyq klınıka tirkegen.
Anyqtalǵandaı, bul klınıkalar is júzinde halyqqa eshqandaı qyzmet kórsetpegen: ǵımarattary, jabdyqtary jáne bilikti mamandary bolmaǵan, al basshylarynyń medısınalyq bilimi de joq bolǵan.
Kúdiktiler azamattardyń zeınetaqy aqshasyn sheship alý úshin jalǵan medısınalyq qujattar rásimdep, odan 10–20 paıyz kóleminde zańsyz syıaqy alyp otyrǵan. Qarajatty qolma-qol aqshaǵa aınaldyrý úshin 226 dropperdi paıdalanǵan. Osylaısha 200 mlrd teńgeden astam qarajat aınalymnan shyǵarylǵan.
Bul aqshalarǵa kúdiktiler jalpy quny 600 mln teńgeden asatyn 15 qymbat avtokólik (Mercedes-Benz G-class, GLE, BMW X7, Porsche Taycan, Cadillac Escalade) satyp alyp, sondaı-aq elıtalyq páterler, komersıalyq nysandar, jer telimderi men zergerlik buıymdardy ıemdengen. Qylmystyq jolmen tabylǵan múlikti izdestirý jalǵasyp jatyr.
Qazir is aıasynda 59 tintý isi júrgizilip, 10 adamǵa bultartpaý sharasy qoldanyldy.
"Tergeý tek zeınetaqy aktıvterin zańsyz shyǵarý sqemalaryn uıymdastyrýshylardyń áreketterine baǵa beredi. Óziniń jınaqtalǵan zeınetaqy qarajatyn alǵan azamattar qylmystyq jaýapkershilikke tartylmaıdy. Barlyq prosesýaldyq áreketter qoldanystaǵy zańnamaǵa saı júrgizilip jatyr, ár kúdiktiniń advokatpen baılanysy shektelmegen", - delingen agenttik habarlamasynda.