Olar saladaǵy birqatar máselelerdi kóterdi.
Qazaqstanyń Ekologıa, geologıa jáne tabıǵı resýrstar mınıstrliginde balyqshylardyń jınalysy ótti, dep habarlaıdy Almaty-akshamy.kz.
«Jıynda respýblıkanyń óńirlerinen kelgen balyqshylar saladaǵy birqatar máselelerdi kóterdi. Máselen, Kaspıı balyqshylary balyq aýlaý aýynyń jip dıametri 0,3 mm-den bastalatyn monojipter jáne monotalshyqtan jasalǵan aýlardy paıdalaný múmkindigin qarastyrýdy jetkizdi», - delingen mınıstrliktiń baspasóz qyzmetiniń habarlamasynda.
Bul máselege qatysty mınıstr osy jyldyń mamyr aıynyń sońyna deıin sheshim qabyldanýy múmkindigin jetkizdi.
«Salalyq ǵylymı uıym sáýir-mamyr aılarynda zertteýler júrgizedi, olardyń nátıjeleri boıynsha mamyr aıynyń sońynda sheshim qabyldaımyz. Eger tikeleı teris áseri bolmaǵan jaǵdaıda, atalǵan aýlardy iri sý aıdyndarynda 2 jylǵa deıin pılottyq rejımde paıdalanýǵa 3-4 aı ishinde zańnamaǵa tıisti ózgerister engizý arqyly ruqsat berýge bolady»-, dedi Ekologıa, geologıa jáne tabıǵı resýrstar mınıstri Serikqalı Brekeshev.
Sonymen qatar, jıynda Balqash kólinde kókserke aýlaý lımıtin arttyrý máselesi kóterildi. Buǵan qatysty mınıstr kókserke aýlaý lımıtiniń ulǵaıýyn 2023 jylǵy maýsymda balyq aýlaý lımıtin anyqtaý ádistemesine ózgerister engizýdi eskere otyryp, qarastyrýǵa bolatynyn aıtty.
Budan bólek, keńeste kásipshilik balyq aýlaýdy júzege asyrý úshin sý aıdynyna qol jetkizý jáne jaǵalaý aımaǵynda turatyn jeke tulǵalardyń balyq aýlaýǵa ruqsat alýy kóterildi. Mınıstrdiń sózinshe, atalǵan máseleni mınıstrlik jaǵalaýdaǵy turǵyndarǵa jeke ruqsat alý arqyly balyq aýlaýǵa múmkindik beretin máseleni qarastyrýda. Sondaı-aq, bekitilgen ýchaskelerde ǵana emes, rezervtik qorda da balyq aýlaýdy júzege asyrý máselesi kún tártibinde boldy.
«Biraq bul máseleler osy salada qyzmet etetin iri bıznestiń pikirin eskere otyryp, keń talqylaýdy qajet etedi. Bul máseleni sheshý úshin, eń aldymen, «Janýarlar dúnıesin qorǵaý, ósimin molaıtý jáne paıdalaný týraly» Zańyna ózgerister engizý qajet. Zańdardy qabyldaýdyń belgilengen tártibi shamamen 1 jyldy talap etetinin birden atap ótkim keledi. Budan ári ruqsat berý erejeleri, kvotalardy bólý erejeleri, balyq aýlaý erejeleri sıaqty birqatar buıryqtarǵa ózgerister engizý kerek. Alaıda, biz sizderdiń kóterip otyrǵan máselelerińizdi sheshý úshin barlyq qajetti sharalardy qabyldaımyz», - dedi Serikqalı Brekeshev.
Jalpy, bes saǵatqa sozylǵan jınalysta balyq sharýashylyǵyna qatysty kóptegen máseleler kóterildi. Jınalys qorytyndysy boıynsha mınıstr jaýapty vedomstvoǵa birqatar naqty tapsyrmalar berdi.