Jarysqa álemniń 20-dan astam elinen 6000-ǵa jýyq adam qatysty.
«Birinshi bolýǵa batyldyq» korporatıvtik qory Astanada ekinshi márte júgirýden jartylaı marafon jarysyn ótkizdi, dep habarlaıdy Almaty-akshamy.kz Elorda.info-ǵa silteme jasap.
Jarys EXPO halyqaralyq kórmesinen bastalyp, álemniń 20-dan astam elinen 6000-ǵa jýyq jelaıaq Astananyń kórnekti Botanıkalyq saıabaq, Ulttyq mýzeı, Táýelsizdik saraıy t.b jerlerin júgirip ótti.
Ashylý saltanatynda Astana qalasy ákiminiń orynbasary Erlan Bekmurzaev qatysyp, osyndaı buqaralyq sport sharalary artqanynyń nátıjesinde óziniń de jelaıaqtar qataryna qosylǵanyn aıtyp ótti. Ol sportty serik etken jandarǵa sáttilik tileı otyryp, júgiretinderdiń sany artqanyna qýanysh bildirdi.
Bıylǵy marafonnyń basty ereksheligi – byltyrǵyǵa qaraǵanda 1 saǵat erte bastaldy. Saǵat 7:00-de 10 shaqyrym qashyqtyqqa tirkelgender saıysty bastasa, 7:25-te jartylaı marafonshylar iske kiristi.
«Kúnniń ystyǵyna sozbaı, saǵat 7-de bastaǵanyna óte qýanyshtymyn. Nátıjesinde byltyrǵyǵa qaraǵanda sál de bolsa jaqsy júgirdim. 10 shaqyrymdy 58 mınýtta baǵyndyrdym. Márege jeter sátte kún shaqyraıyp, temperatýranyń joǵarylyǵy bilindi. Kelesi jyly 6-da bastasa degen tilegim bar», - dep óz oıymen bólisti 57 jastaǵy Astana turǵyny Qanat Almanov.
Ókinishke qaraı, bıyl qatysýshylardyń sany artqanymen, byltyrǵy rekordtardyń murty buzylmady.