Búgin Shveısarıada QR Mádenıet jáne aqparat mınıstrliginiń qoldaýymen uıymdastyrylǵan «Astana Balet» teatrynyń gastrólderi bastaldy.
Astanalyq ujym Jenevanyń Batiment des Forces Motrices mádenıet ortalyǵynda úsh kún boıy ulttyq jáne zamanaýı horeografıanyń úzdik týyndylary A.Alonsonyń «Karmen-súıta» baleti, «Taǵdyr bultarystary» avtorlyq spektakli men «Uly Dala murasy» gala-konsertin kórermen nazaryna usynady, dep habarlaıdy almaty-akshamy.kz.
«Meniń oıymsha, kez-kelgen gastról – tájirıbe almasý, mádenı dástúrdi pash etý. Osy turǵydan alǵanda Jeneva biz úshin jańa qala. Biz kórsetetin spektáklder, sóz joq, ozyq qoıylymdar. Jeneva kórermeni de bul týyndylardy zor iltıpatpen qabyl alaryna úmittimiz», - degen oıymen teatr dırektory Aleksandr Sovostánov bólisti.
Kórermenge Jorj Bıze-Radıon Shedrın mýzykasyna A.Alonso qoıǵan «Karmen-súıta» baleti kórsetiledi. Bul – HH ǵasyr balet óneriniń ozyq úlgisi. Horeografıalyq ónerdiń jankúıerleri «Astana Balet» teatrynyń bas baletmeısteri Mýkaram Abýbahrıeva Karına Abdýllınanyń mýzykasyna qoıǵan «Taǵdyr bultarystary» mıstıkalyq spektaklin tamashalaı alady.
Sondaı-aq, óner súıer qaýymǵa Qazaqstannyń eńbek sińirgen qaıratkerleri Aıgúl Tátı men Mýkaram Abýbahrıeva týyndylarynan quralǵan «Uly Dala murasy» gala-konserti kórsetiledi. Ulttyq bolmysymyzdy bı tilimen jetkizetin etnografıalyq jáne beınelik naqyshqa baı týyndy teatrymyzdy áıgilep turǵan dúnıege aınalyp, Eýropa men Amerıkanyń talaı kórermenin tamsandyrǵan.