Investısıalyq jobalardy iske asyrý barysy qaraldy.
Qazaqstan Úkimetiniń jetekshisi Asqar Mamınniń tóraǵalyǵymen ótken Investısıalyq shtab otyrysynda Ekologıa, geologıa jáne tabıǵı resýrstar mınıstrliginiń, «Báıterek» UBH» AQ, sondaı-aq Jambyl jáne Aqmola oblystarynyń ákimdikteriniń ınvestısıalyq jobalardy iske asyrý barysy qaraldy, dep habarlaıdy Almaty-akshamy.kz Primeminister.kz saıtyna silteme jasap.
Ekologıa, geologıa jáne tabıǵı resýrstar mınıstri Serikqalı Brekeshev ekologıa, geologıa, balyq, orman jáne sý sharýashylyǵy salalarynda EGTRM negizgi kapıtalǵa tartatyn ınvestısıalardyń 2021-2025 jyldarǵa arnalǵan nysanaly kólemi 2,5 trln teńgeni quraıtynyn málim etti.
Investısıalyq jobalar pýlyna Nur-Sultan, Aqtóbe, Shymkent, Óskemen, Qaraǵandy jáne Almaty qalalarynda «Waste to Energy» qoqys jaǵatyn zaýyttaryn salý, jer qoınaýyn geologıalyq zertteý salasynda sheteldik áriptestermen yntymaqtastyqty keńeıtý, sýmen qamtamasyz etýdiń tuıyq sıklindegi balyq ósirý sharýashylyqtaryn, toǵan jáne sharbaqty balyq ósirý sharýashylyqtaryn damytý, Kaspıı teńizinde balyq aýlaýdy uıymdastyrý, qurama jem, artemıa sıstalaryn óńdeý zaýyttaryn salý jáne t. b. kiredi.
Orman qorynda ekologıalyq týrızmdi damytý maqsatynda İle Alataýy, Sharyn, «Kólsaı kólderi», «Altyn Emel» jáne t. b. memlekettik ulttyq tabıǵı parkterinde qajetti ınfraqurylymdy qalyptastyrý boıynsha jobalar iske asyrylady. Sý sharýashylyǵy salasynda Jambyl oblysyndaǵy Tasótkel magıstraldy kanalyn, Úlken Almaty kanalyn, Almaty oblysynyń sý sharýashylyǵy jáne gıdromelıoratıvtik júıelerin rekonstrýksıalaý jáne jańǵyrtý, Túrkistan oblysyndaǵy Ógem ózeninde SES kaskady bar sý tartqysh salý josparlanyp otyr.
«Báıterek» UBH» AQ basqarma tóraǵasy Aıdar Áriphanov Qazaqstannyń Damý Bankiniń (QDB) qorjynynda jalpy somasy 7,1 trln teńgege 61 ınvestısıalyq joba jáne 16 eksport aldyndaǵy operasıa bar ekenin aıtty.
Osy jyldyń 6 aıynda QDB jańartylatyn energetıka, avtomobıl jasaý, TMK jáne týrızm salalarynda 47 mlrd teńgege 5 ınvestısıalyq jobany jáne 67,9 mlrd teńgege 14 eksporttyq operasıany qarjylandyrdy. Logıstıka, qurylys ındýstrıasy, jańartylatyn energetıka, TMK salalaryndaǵy 4 ınvestısıalyq joba, sondaı-aq 211 mlrd teńge somasyna 2 eksport aldyndaǵy operasıa qarjylandyrýǵa maquldandy.
Ónerkásipti damytý qory jelisi boıynsha aýyl sharýashylyǵy tehnıkasyn, avtobýs parkin, júk vagondaryn, komýnaldyq jáne órt sóndirý tehnıkasyn jańartý, otandyq avtoóndirýshilerdi qoldaý jáne t. b. boıynsha jalpy somasy 45,88 mlrd teńgege 198 joba qarjylandyryldy.
AÓK damytý aıasynda «Báıterek» UBH» AQ enshiles qurylymdary 2021 jyldyń İ jartyjyldyǵynda 282,5 mlrd teńge somasyna 14 397 qaryz berdi. Osy jyldyń aıaǵyna deıin sektordy barlyǵy 388,3 mlrd teńge kóleminde qarjylandyryp, 831 mln teńgege 373 birlik kepildik berý kózdelip otyr.
«Kazakh Invest» UK» AQ basqarma tóraǵasy Meıirjan Iýsýpov «Task Force» arnaıy ınvestısıalyq bólimshesi AÓK, hımıa jáne taý-ken metalýrgıasy ónerkásibi, farmasevtıka, energetıka, qurylys materıaldaryn óndirý, kólik jáne logıstıka salalarynda $12 mlrd astam somaǵa 57 jobany pysyqtap jatqanyn málimdedi.
Jambyl oblysy ákiminiń orynbasary Almas Mádıev 2021-2025 jyldarǵa ákimdik AÓK, hımıa jáne taý-ken metalýrgıasy ónerkásibi, jańartylatyn energetıka, qurylys materıaldaryn óndirý jáne t. b. sıaqty salalarda jalpy somasy 2,5 trln teńgege 107 ınvestısıalyq jobadan turatyn pýl qalyptastyrǵanyn atap ótti. Bıylǵy jyldyń 8 aıynda Jambyl oblysynda negizgi kapıtalǵa salynǵan ınvestısıalar kólemi 231,1 mlrd teńgeni qurady, bul ótken jylǵy sáıkes kezeńdegi kórsetkishten 20,2%-ǵa artyq. Osy jyly negizgi kapıtalǵa 421 mlrd teńge kóleminde ınvestısıalar aǵynyn qamtamasyz etý josparlanyp otyr.
Aqmola oblysy ákiminiń orynbasary Qanat Ydyrysov aldaǵy 5 jylǵa ákimdik AÓK, qurylys ındýstrıasy, TMK, energetıka, mashına jasaý, týrızm, bilim berý jáne t. b. salalarda 1,8 trln teńge somasyna 330 jobadan turatyn pýl qurǵanyn baıandady. Bıyl jalpy somasy 695,8 mlrd teńgege 108 joba iske asyryla bastady. Osy jylǵy qańtar-tamyz aılarynda Aqmola oblysynda negizgi kapıtalǵa salynǵan ınvestısıalar kólemi 276,3 mlrd teńgeni qurady, bul ótken jylǵy sáıkes kezeńdegi kórsetkishten 10%-ǵa artyq. Bıyl negizgi kapıtalǵa barlyǵy 558 mlrd teńge kóleminde ınvestısıa aǵynyn qamtamasyz etý kózdelip otyr.
Úkimet basshysy barlyq memlekettik organǵa, óńirler ákimdikterine jáne kvazımemlekettik sektor sýbektilerine ishki jáne syrtqy ınvestısıalardy tartý boıynsha jumysty júıeli negizde jalǵastyrýdy tapsyrdy.