Batyr ushqyshtyń 100 jyldyq mereıtoıy atalyp ótti.
28 panfılovshylar saıabaǵynda eki márte Keńes Odaǵynyń Batyry Talǵat Bıgeldınovtiń 100 jyldyq mereıtoıyna oraı merekelik shara uıymdastyryldy. Ondaǵy áskerı sherýde 800-den astam áskerı qyzmetker boı kórsetti. Saıabaq alańyna aty ańyzǵa aınalǵan ushqysh-jaýyngerdiń mýzeılik eksponattary, muraǵat qujattary qoıyldy. Sondaı-aq, sırek kezdesetin qoljazbalary men kitaptary, sýretterden turatyn tyń dúnıeleri kópshilik nazaryna usynyldy.
«Talǵat Bıgeldınov qazaqtyń ul-qyzdaryna óshpes ónegeli izin qaldyrǵan. Ol - kók júzinde qaharmandyq erlikterdiń erekshe úlgisin kórsetip ketken aty ańyzǵa aınalǵan dańqty tulǵa. Keńes Odaǵynyń batyry Talǵat Bıgeldınov soǵysta eki jylyn ǵana ótkizdi. Osy ýaqyttyń ishinde 305 áskerı shabýylǵa qarsy shyǵyp, kóptegen komandalyq tapsyrmalardy oryndaǵan. Berlın úshin júrgizilgen shaıqastarǵa qatysyp, myńdaǵan jaýyngerlermen birge elimizge batyr bolyp oraldy. Keleshek urpaqqa ómir súrýdiń laıyqty úlgisin qaldyrdy. Bizdiń mindetimiz – onyń ómiri men qyzmetin keıingi urpaqtyń máńgi esinde qaldyrý», – dedi Medeý aýdanynyń ákimi Erkebulan Orazalın.
Merekelik is-shara aıasynda Qorǵanys mınıstrligi Almaty fılıaly áskerı-tehnıkalyq mektebiniń 130 túlegi Otanǵa adal bolýǵa Ant berdi. Joǵary tehnıkalyq mektep kýrsanttary elimizdiń eleýli batyrlaryn qurmettep, eske aldy. Osy rette mektep áskerı-patrıottyq tárbıe berýdiń ortalyǵy bola otyryp, áskerge shaqyrylýǵa deıingi jáne áskerge shaqyrylatyn jastardy áskerı-patrıottyq tárbıeleýge úlken kóńil bóletindigin de erekshe atap ótkenimiz jón.
«Bul sharaǵa Almaty qalalyq garnızonynyń búkil áskerı qyzmetshileri qatysty. İs-shara jaqsy ótti degen oıdamyn. Men ózim Halyq Qaharmany ataǵyn alǵan kezimde men ol kisimen bir sapta turǵan edim. Talǵat Bıgeldınov «Otan» ordenimen marapattalǵan edi. Ol kisini kórip, dıdarlasý meniń armanym bolatyn. Sol kezde qolyn alyp, jyly lebizine bólengen edim. Biz batyrlarymyzdy eshqashan umytpaımyz, jastarymyzǵa úlgi-ónege kórsetý maqsatynda osyndaı is-sharalarǵa alyp kelemiz. Gúl shoqtaryn qoıdyryp, osy atalarymyz sekildi bolýlaryna tilek bildiremiz», – deıdi Halyq Qaharmany, podpolkovnık Azamat Jumadilov.
Atalmysh is-sharany Generaldar keńesi men «UOS ardagerleri, tyl eńbekkerleri jáne soǵys balalary keńesi» qoǵamdyq qory uıymdastyrǵan.
«Talǵat Bıgeldınovtiń 100 jyldyǵyna oraı áskerıler arasynda kóptegen is-sharalar, tárbıe saǵattary uıymdastyryldy. Sondaı-aq, dańqty batyrdyń erlik isteri týraly «Áýege kóterilý» derekti fılmi kórsetildi. Jastardyń shamshyraǵyna aınalǵan atamyzdyń mereıli merekesi elimiz boıynsha joǵarǵy deńgeıde ótkiziledi dep senimmen aıta alamyn. Bolashaqta osy Almaty qalasynda batyrdyń rýhyna arnap eskertkish-taqta qoıý oıymyzda bar. Qalalyq ákimdikke usynyp, ol kisilerdiń maquldaýyn kútetin bolamyz. Alaıda, ol kisiniń jalǵyz óziniń eskertkishin emes, shabýyldaýshy ushqyshtar T.Bıgeldınov, L.Beda, I.Pavlov jáne joıǵysh ushaq ushqyshy S.Lýganskııdiń birikken eskertkishin qoıamyz degen oıdamyz», – deıdi QR Qarýly Kúshteri Aero-desanttyq-shabýyldaýshy áskerler qolbasshysynyń tárbıe jáne ıdeologıalyq jumys jónindegi orynbasary Radjan Janysov.
Áskerı áýe joldaryn baǵyndyrǵan, aspan adamy ataǵyna ıe bolǵan qaharman atamyzdyń esimi áldeqashan-aq sol aspan bıigine deıin sharyqtap ketti. Antalaǵan jaýǵa tutqıyldan soqqy berip, eseńgiretken esil er óz ómirinde 305 ret kókke kóterilgen eken. Shaıqastarda erlik kórsetip, Keńes Odaǵynyń Batyry ataǵyn eki márte alǵan qazaq halqynyń maqtanyshy. Talǵat aǵamyzdyń artynan ergen urpaqtary búgingi kúni óz estelikterimen bólisip, bolashaq urpaqqa batyrdyń tabandylyǵy men qaıratkerligin baıan etýde.
«Merekelik is-sharaǵa ákemniń kózin kórgen jandar kelip jatyr. Syrbaz sarbazdardyń sap túzegenin kórip, kóńilimiz jandanyp otyr. Uıymdastyrýshylarǵa erekshe alǵysymdy bildiremin. Jigitterimizge qarap bizdiń qalamyz qandaı ásem dep tańdanamyn. Beıbit kúnde ómir súrip jatqanymyzǵa qatty qýanamyn, soǵys pen qaqtyǵystar bolmasyn dep tileımin. Jastarymyzdyń ákemiz sekildi erjúrek, batyl, qaıratty bolǵandaryn qalaımyn. Soǵys órti seıilgen beıbit jyldary Talǵat Jaqypbekuly azamattyq avıasıany basqardy. Máskeýdegi qurylys ınstıtýtyn bitirip, záýlim ǵımarattardy turǵyzýǵa atsalysty. Mine, bizdiń ákemiz osyndaı jaýynger jan bolǵanyna qatty qýanamyn. Elimizdiń barlyq jastary sol kisi sekildi bolǵanyn qalaımyn», – deıdi qyzy Galıa Bıgeldınova.
Mańdaıyna erekshe taǵdyr jazylǵan qazaqtyń osyndaı arda azamaty bolǵanyna biz de myń da bir shúkirshilik aıtamyz.
«Merekelik keshke elimizge eleýli tulǵalar keldi. Atamyzdyń ónegeli ómir jolyna qarap otyryp, bizder úlgi alamyz. Meniń súıikti batyrym da dál osy kisi. Ulaǵatty sózderi meniń jadymda máńgi saqtalady. Biz Talǵat atamyzdyń urpaǵymyz. Ol kisiniń jolymen júrý bizdiń boryshymyz. Aǵaıyn-týys, dos-jarandarym maǵan Talǵat atamyzǵa túr-kelbetiń, mineziń uqsaıdy dep jatady. Sol sebepten, men baqytty ulanmyn dep aıta alamyn», – deıdi leıtenant İńkár Altaı.
Talǵat atamyzdyń dostary men áriptesteriniń estelikterine súıensek, ol ómirde aqjarqyn, qarapaıym, ózinen kómek surap kelgenderge árdaıym qol ushyn sozyp, kómektesetin keńpeıildi adam bolǵan. Talǵat Bıgeldınov - qoǵamǵa tanylyp, halyqtyń mahabbatyn tiri kezinde sezinip ketken jan.