Aqtóbe qalasynyń Áskerı dańq murajaıynda ekspozısıa ashyldy.
Qarýly Kúshterde aty ańyzǵa aınalǵan ushqysh-shabýyldaýshy, Uly Otan soǵysynyń dańqty ardageri, avıasıa general-maıory Talǵat Jaqypbekuly Bıgeldınovtyń bústterine, eskertkishterine jáne jerlengen jerine gúl shoqtary qoıylyp, saltanatty rásimder ótti, dep habarlaıdy Almaty-akshamy.kz QR Qorǵanys mınıstrliginiń baspasóz qyzmetine súıenip.
Nur-Sultanda ótken jyly ornatylǵan eskertkishke gúl shoqtaryn qoıý rásimine Qorǵanys mınıstri, general-polkovnık Rýslan Jaqsylyqov, onyń orynbasarlary, Qarýly Kúshter túrleriniń bas qolbasshylary, ásker tekteriniń qolbasshylary, ardagerler, jergilikti atqarýshy organdar men qoǵamdyq uıymdardyń ókilderi qatysty.
Qorǵanys vedomstvosynyń basshysy eki márte Keńes Odaǵynyń Batyry Talǵat Bıgeldınovtiń erlik joly, onyń Qazaqstannyń azamattyq jáne áskerı avıasıasyn damytýǵa, eldiń mádenı nysandary men ındýstrıalyq ınfraqurylymyn salýǵa qosqan baǵa jetpes úlesin atap ótti.
«Avıasıa general-maıory Talǵat Jaqypbekuly Bıgeldınovtiń ómir joly – HH ǵasyrdaǵy surapyl soǵystyń oshaǵynan ótken batyrlyqtyń, qajymas qaırattyń, tabandylyqtyń aıqyn úlgisi. Biz, batyrdyń izin basyp kele jatqan urpaq jáne jas býyn qazaq halqynyń batyr ulynyń janqıarlyǵyn maqtan etip, erligin jadymyzda máńgi saqtaımyz», – dep atap ótti Qorǵanys mınıstri.
Osy kúni Aqtóbe qalasynyń Áýe qorǵanysy kúshteri áskerı ınstıtýtyndaǵy Áskerı dańq murajaıynda ekspozısıa ashyldy. Onda Bıgeldınovtar otbasynyń jeke muraǵatynan alynǵan fotosýretter, batyr ómiriniń keı sátterinen estelik-jádigerler qoıylǵan.
Áýe qorǵanysy kúshteri áskerı ınstıtýty basshylyǵynyń aıtýynsha, murajaı aqtóbelikterdi jáne Ortalyq Azıadaǵy jalǵyz áskerı ushqyshtar daıyndaıtyn ınstıtýttyń kýrsanttaryn tárbıeleýge yqpal etedi.
Ǵasyrlyq mereıtoıǵa oraı Áýe qorǵanysy kúshteriniń bas qolbasshysy, avıasıa general-leıtenanty Nurlan Ormanbetov Qarýly Kúshterdiń Ortalyq áskerı-tarıhı mýzeıine elordada ornatylǵan Talǵat Bıgeldınov eskertkishiniń shaǵyn kóshirmesin tapsyrdy. Salmaǵy 25 keliden asatyn jarty metrlik músin qoladan quıylǵanyn aıta ketken jón.