Bot áskerılerdiń otbasylaryna da kúızelis jáne qıyn jaǵdaılarda táýlik boıy kómek kórsetýge arnalǵan, dep habarlaıdy aqshamnews.kz Qorǵanys mınıstrligine silteme jasap.
Astanada áskerı psıhologtar jınalysynda jasandy ıntellekt negizinde ázirlengen AI-sulu Telegram-boty tanystyryldy. Bul jańa qyzmet áskerı qyzmetshiler men olardyń otbasylaryna kúızelis jáne qıyn jaǵdaılarda táýlik boıy anonımdi túrde kómek kórsetýge arnalǵan.
Qorǵanys mınıstriniń tárbıe jáne ıdeologıalyq jumystar jónindegi orynbasary vıse-admıral Serik Borambaevtyń aıtýynsha, qazirgi zamannyń talaptary ınovasıalyq sıfrlyq sheshimderdi engizýdi qajet etedi.
"Psıhologıa – áskerdiń jaýyngerlik daıyndyǵyn qamtamasyz etýdiń mańyzdy elementi. Áskerı qyzmetshilermen jáne olardyń otbasylarymen tıimdi jumys isteý armıanyń moraldyq kúshiniń negizi bolyp tabylady", – dedi Borambaev.
Sıfrlyq keńesshi qazaq jáne orys tilderinde qoljetimdi. Onyń basty artyqshylyǵy – anonımdilik pen táýlik boıy qoljetimdilik.
"AI-sulu tiri mamannyń ornyn almastyra almaıdy, biraq ol qıyn sátterde alǵashqy kómek kórsetip, tyńdaı otyryp, qajetti keńes pen resýrstarǵa baǵyttaı alady", – dedi Ulttyq áskerı-patrıottyq ortalyǵy aqparattyq bóliminiń bastyǵy maıor Qasymhan Týıtın.
Bul tájirıbe áskerı qurammen jumys isteýde óte paıdaly bolatynyn jáne áskerı psıhologıa qyzmeti úshin jańa ádistemelik materıaldardyń negizine aınalady dep kútilip otyr.