Almaty qalasynda, 28 panfılovshy saıabaǵynda M. Esbolatov atyndaǵy Almaty akademıasynyń birinshi kýrs kýrsanttary Ant qabyldaý rásimin saltanatty túrde ótkizdi, dep habarlaıdy aqshamnews.kz Polisia.kz-ke silteme jasap.
Bıylǵy shara erekshe formatta uıymdastyrylyp, eki aıtýly dataǵa arnaldy – Respýblıka kúnine 35 jyl jáne Uly Jeńistiń 80 jyldyǵy. Ótetin oryn da sımvoldyq mánge ıe: Panfılovshylar saıabaǵy – tarıh pen taǵzymǵa toly qasıetti meken, urpaqtar sabaqtastyǵyn sezindiretin, otansúıgishtik rýhyn darytatyn oryn. Saltanatqa ishki ister organdarynyń ardagerleri, qurmetti qonaqtar, İİM basshylyǵy, kýrsanttardyń ata-analary jáne Gonkong polısıa akademıasynan arnaıy delegasıa qatysty.
– Búgin bizdiń jas kýrsanttar ómirindegi eń alǵashqy ári mańyzdy qadamdy jasap otyr – olar Ant qabyldady. Halyqqa adal qyzmet etýge, zańdy qasterleýge jáne ofıser abyroıyn saqtaýǵa sert berdi. Bul oqıǵanyń dál osy jyly, osy jerde ótýi biz úshin asa mańyzdy. Respýblıka kúni men Jeńis mereıtoıy táýelsizdiktiń baǵasyn, Otanǵa qyzmet etýdiń úlken jaýapkershilik ekenin eske salady, – dep atap ótti Qazaqstan Respýblıkasy İİM Maqan Esbolatov atyndaǵy Almaty akademıasynyń bastyǵy Qalıjan Qoblandın.
Ata-analar úshin de bul kún erekshe tolqynys pen maqtanyshqa toly sát boldy.
– Bul kúndi biz kóp kúttik. Biz úshin bul balalarymyzdyń eseıip, mańyzdy sheshim qabyldaǵanynyń aıǵaǵy. Endi olar elge qyzmet etýge daıyn. Búgin olardy jınaqy, symbatty, ózine senimdi kórip, júregimizdi maqtanysh sezimi kerneıdi, – dedi ata-analardyń biri.
Jas kýrsanttar bul kúnge uzaq daıyndaldy. Búgin olar sap túzep, paradtyq kıimde, jınaqy da tártipti bolyp, Akademıa qataryn tolyqtyryp, ofıserlik jolǵa alǵashqy qadam basty.