Qarýly kúshterde qysqy dalalyq kıimniń jańa úlgilerine kóshken jeke quramnyń saptyq baıqaýlary ótti.
Esterińizge sala keteıik, áskerı qyzmetshilerge arnalǵan biryńǵaı dalalyq kıim nysanyna kóshý qajettiligi 2023 jylǵy mamyrda ótken búkilarmıalyq keńeste málimdelgen bolatyn. QR Prezıdentiniń 2023 jylǵy 12 jeltoqsandaǵy Jarlyǵy shyqqannan keıin qoıylǵan tapsyrmalardy iske asyrý bastaldy, dep habarlaıdy aqshamnews.kz Qorǵanys mınıstrligine silteme jasap.
Qarýly kúshter Tyly bastyǵynyń orynbasary polkovnık Áset Orazalın túsindirgendeı, erekshe kezeńde basqa áskerler men áskerı quralymdar Qarýly kúshterdiń basqarýyna ótedi. Tıisinshe, búrkemeleý fýnksıasyn oryndaıtyn jáne klımat pen aımaqtyń geografıalyq erekshelikterin eskeretin dalalyq forma da birtutas bolýy kerek.
Kıim formasy 1999, 2006 jáne 2011 jyldary aıtarlyqtaı ózgeristerge ushyrady. Biraq barlyq kúshtik qurylymdar áskerı qyzmetshileriniń biryńǵaı stıli men túsine kóshý alǵash ret júzege asyrylyp otyr.
MultiCam boıaýyna kóshý týraly sheshim basqa elderdiń tájirıbesin zerdelegennen keıin qabyldandy. Ol ósimdikterge, qalalyq ǵımarattar men qırandylarǵa, shóldi jáne tasty jerlerde erekshe búrkemeleý qasıetine ıe.
Kıim pishininiń jańa úlgileri jaqsartylǵan fýnksıonaldylyqpen jáne jaılylyqpen erekshelenedi. Mysaly, jaǵasy aýa-raıy qolaısyz bolǵan kezde moıyndy jabady. Qalta qujattaryn ońaı saqtaý úshin keýde qaltalary kólbeý ornalasqan jáne velkro taspasyna bekitilgen. Aıyrym belgileri de osy taspaǵa bekitiledi jáne tigýdi qajet etpeıdi. Artqy jaǵyndaǵy qosymshalar qozǵalysty shektemeıdi. Keń shalbar belbeýi denege jaqsy sáıkes keledi, sonymen qatar formany retteýge arnalǵan qurylǵylary bar.
Qysqy kıim formasyna túbegeıli ózgerister engizildi. Matanyń sýǵa, aıazǵa jáne jelge tózimdi qasıetteri bar. Qalyń shalbar jartylaı kombınezon túrinde jasalǵan. Sondaı-aq, toqylǵan qalpaq pen júnnen jasalǵan sharf ta qarastyrylǵan.
Áskerı qyzmetshilerdiń ótinishi boıynsha is júzinde paıdalanylmaǵan maýsymdyq plash kýrtkaǵa aýystyryldy. Kúndelikti jempirdiń ornyna dalalyq jempir beriledi. Tabıǵı erekshelikterine súıene otyryp, jazǵy etikterdiń túsi qara tústen qum túsine ózgerdi. Basqarý organdarynyń áskerı qyzmetshileri úshin qonyshy bıik etik taktıkalyq krosovkalarǵa aýystyryldy.
Inovasıanyń ekonomıkalyq quramdas bóligi de mańyzdy. Ony iske asyrý qysqartylǵan kıim-keshek quny esebinen ǵana júzege asyrylady. Jabdyqtaý normalaryn ońtaılandyrý áskerlerdiń jyl saıynǵy qajettiligin 140 mln teńgege azaıtty.
Bul rette qoımalardaǵy bar qorlar, onyń ishinde eski úlgidegi dalalyq kıim-keshek merzimdi qyzmet sarbazdary, jyl saıynǵy jıyndarǵa tartylatyn áskerı mindettiler úshin jáne áskerılendirilgen kúzet qyzmetkerleri úshin jumys kıimi retinde paıdalanylatyn bolady. Bul jyl saıyn osyndaı kıim-keshek satyp alýǵa 400 mln teńgeden astam qarajatty únemdeýge múmkindik beredi.
Sondaı-aq, áskerı kıim-keshek memlekettik qorǵanys tapsyrysy aıasynda tek otandyq kásiporyndarda jasalatynyn atap ótken jón.