QR Qorǵanys mınıstrligi «Qazaqstan Respýblıkasy Qorǵanys mınıstriniń keıbir buıryqtaryna ózgerister engizý týraly» qorǵanys vedomstvosy basshysy buıryǵynyń jobasyn ázirledi, dep habarlaıdy aqshamnews.kz Qorǵanys mınıstrligine silteme jasap.
Atalmysh ózgerister 2017 jylǵy 24 qańtardaǵy «Áskerı mindettiler men áskerge shaqyrylýshylardy áskerı esepke alý qaǵıdalaryn bekitý týraly» jáne 2019 jylǵy 9 shildedegi «Uly Otan soǵysynyń ardagerlerine kýálikter berý qaǵıdalaryn bekitý týraly» eki buıryqqa qatysty.
Normatıvtik quqyqtyq qujat qaǵıdalardy «Áskerı qyzmet jáne áskerı qyzmetshilerdiń mártebesi týraly» Zańnyń 12-babyna jáne Qazaqstan Respýblıkasy Úkimetiniń 2022 jylǵy 2 maýsymdaǵy qaýlysymen bekitilgen QR Qorǵanys mınıstrligi týraly erejeniń 15-tarmaǵynyń 176) tarmaqshasyna sáıkes keltirý maqsatynda daıyndaldy.
Erejelerdegi keıbir tehnıkalyq túzetýlermen qatar qyzmet kórsetý merzimi úsh jumys kúnine deıin qysqarady. Bul áskerı mindettilerge áskerı bıletterdi nemese olardyń telnusqalaryn berýge jáne áskerı mindettiler men áskerge shaqyrylýshylardy áskerı esepke qoıýǵa qatysty.
Buıryq jobasynyń tolyq mátinimen «Elektrondyq úkimet» portalynda «Ashyq NQA» bóliminde osy jyldyń 14 qarashasyna deıin myna https://legalacts.egov.kz/npa/view?id=15264085 silteme boıynsha tanysýǵa bolady.