Áskerı qyzmetshi bir jarym puttyq gir tasyn 103 ret kóterdi
Qazaqstan Respýblıkasy Qarýly Kúshteri Áskerı polısıa bas basqarmasynyń bastyǵy, polkovnık Rýslan Qulymbetovtiń usynysymen "Qýatty Armıa – Jańa Qazaqstan" chellendji elordada óz máresine jetti, dep habarlaıdy Almaty-akshamy.kz.
Bas áskerı polısıa basshysynyń sporttyq bastamasy qazaq batyrlaryn jas urpaqqa úlgi etip, tárbıeleýge baǵyttalǵan.
"Qazaqtyń keń baıtaq jeri álem boıynsha 9-shy orynda. Ata-babamyz bul jerdi naızanyń ushymen, bilektiń kúshimen qorǵaǵan. Sondyqtan biz qaramaǵymyzdaǵylardyń myqtylyǵyn tekserýdi jón kórdik", – dedi QR QK Áskerı polısıa bas basqarmasynyń bastyǵy.
Polkovnık Rýslan Qulymbetovtyń bastamasy eń shalǵaı garnızondarda jalǵasyn tapty. Aqmola, Qaraǵandy, Almaty, Taraz, Shymkent, Aqtaý, Aqtóbe óńirlik garnızondarynyń áskerı polısıa basqarmalary, Qonaev, Taldyqorǵan, Semeı, Aıagóz, Óskemen jáne Úsharal qalalarynyń áskerı polısıa bólimderi arqyly ótken 24 kelilik gir tasy elordaǵa jetti.
Jarystyń sońǵy kezeńi Qorǵanys mınıstrliginiń Rejım men qaýipsizdikti qamtamasyz etý jónindegi áskerı polısıa jasaǵynda ótti. Birinshi rekord Aqtaýda tirkelgenin aıta keteıik. Aqtaý óńirlik garnızony áskerı polısıa basqarmasy áskerı polısıa bóliminiń áskerı qyzmetshisi bir jarym puttyq gir tasyn 103 ret kóterdi.
Bul nátıjeni Astanada jedel áreket etý bóliminiń aǵa mamany 3-synypty serjant Qýat Aıazbaev jańartty. Ol eshqashan kásibı túrde gir tasyn kóterý sportymen aınalyspaǵanyn aıtty.
"Biz, áskerı qyzmetshiler, udaıy túrde dene shynyqtyryp, sportpen shuǵyldanýymyz kerek. Kúndelikti jattyǵýlardyń arqasynda men búgin osyndaı nátıjege qol jetkizdim", – dedi Qýat Aıazbaev.
Rekordty jańartqan jigit, áskerde boryshyn ótegen soń armıada kelisimshart boıynsha qalyp, 10 jyldan astam ýaqyt qyzmet etip keledi.