Cheh Respýblıkasynan Qazaqstanǵa jańǵyrtýdan jáne kúrdeli jóndeýden ótken L-39 oqý-jaýyngerlik ushaqtary jetkizildi.
Olar buryn memlekettik qorǵanys tapsyrysynyń sharty aıasynda óndirýshi zaýytqa jóndeýge jiberilgen bolatyn, dep habarlaıdy Almaty-akshamy.kz Elorda.info saıtyna silteme jasap.
Modernızasıadan ótken ushaqtyń jańa sıfrlyq jáne katapýlttik júıesi, obektıvti baqylaýy, baılanys quraldary jáne taǵy basqalary jańardy.
L-39 ushaǵy kýrsanttardy ushý tehnıkasyna alǵashqy úıretýge arnalǵan. Onda oqý oryndary men bólimderdiń ushý quramynyń jattyǵýlary ótkiziledi, áýe nysanalaryn ustaý, baılanysty jaýyngerlik is-árekette qoldaný elementteri ıgeriledi, jerústindegi nysanalardy zaqymdaý is-qımyldary pysyqtalady.
Kýrsanttardyń ushý tájirıbesine paıdalanatyn ushaǵy osy. Olar úshin derbes ushý – mańyzdy. Sebebi ushý sheberligin ıgerýdiń alǵashqy qadamy bastalady. Budaı keıin olarǵa jaı jáne kúrdeli pılotajǵa, baǵyt boıynsha, bulttarda, tómen bıiktikte ushýǵa ruqsat beriledi, – dedi avıasıalyq oqý-jattyǵý ortalyǵynyń komandıri, polkovnık Azamat Asanov.
Endi jańǵyrtylǵan ushý apparattarynda Áýe qorǵanysy kúshteri áskerı ınstıtýtynyń úshinshi kýrs kýrsanttary taǵylymdamadan ótýde. Ushý bastalǵanǵa deıin bolashaq ushqyshtar ushaqtyń teorıalyq jáne materıaldyq bóligin, ushý jumysyn jáne erekshe jaǵdaılarda áreket etý tártibin retteıtin qujattamany zerdeledi. Jańartylǵan L-39 oqý-jattyǵý jaýyngerlik ushaǵyn meńgerýge tájirıbeli ushqysh-nusqaýshylar kómektesedi.