Mınıstrlik málimetinshe, buqaralyq aqparat quraldary men áleýmettik jelilerde jastardy eriksiz ustap alyp, jergilikti áskerı basqarý organdaryna jetkizip jatqan beınematerıaldar taratylyp jatyr, dep habarlaıdy almaty-akshamy.kz.
"Osyǵan baılanysty Qorǵanys mınıstrligi jylyna eki ret (kóktemgi jáne kúzgi áskerge shaqyrý) júzege asyrylatyn áskerı qyzmetke shaqyrýdyń qoldanystaǵy tártibin túsindirýge ókiletti. Shaqyrý naýqandary barysynda keıbir azamattardyń áskerı qyzmetten jaltaryp, jergilikti áskerı basqarý organdaryna ýaqtyly kelmeý faktileri baıqalady.
Sonymen qatar, áskerge shaqyrý jasyndaǵy azamattardy esepke alýda da qıyndyqtar týyndaıdy. Óıtkeni olardyń kópshiligi tirkelgen jerinde turmaıdy. Al qonys aýdarǵan jaǵdaıda jańa turǵylyqty mekenjaıyna tirkelmeıdi", - deıdi mınıstrlik ókilderi.
Qoldanystaǵy zańnamaǵa sáıkes shaqyrý qaǵazyn áskerge shaqyrylýshynyń jeke ózine tapsyrý múmkin bolmaǵan kezde onyń kelýin qamtamasyz etý ishki ister organdaryna júkteledi.
"Reıd kezinde keıbir azamattar ishki ister organdary qyzmetkerleriniń zańdy talaptaryna baǵynbaı, qarsylyq kórsetip jatady. Mundaı jaǵdaıda polısıa qyzmetkerleri olardy májbúrli túrde ustap, shaqyrý pýnktine jetkizýdi júzege asyrýǵa quqyly. Shaqyrý komısıasy jetkizilgen adamdardyń mártebesin sol jerde anyqtaıdy. Merzimdi áskerı qyzmetke shaqyrýǵa negiz bolmaǵan jaǵdaıda olardy úıine jiberedi. Al shaqyrýǵa negiz bolsa, medısınalyq komısıadan ótýge jáne shaqyrý sheńberindegi basqa da is-sharalardy ótkizýge jiberedi.
Esterińizge sala keteıik, merzimdi áskerı qyzmetke shaqyrýdan jaltarǵany úshin zańnamada ákimshilik jáne qylmystyq jaýapkershilik qarastyrylǵan. Osynyń negizinde azamattardan qoldanystaǵy zańnama talaptaryn saqtaýdy jáne jalǵan aqparatty taratpaýdy suraımyz", - deıdi mınıstrliktegiler.