Áskerge shaqyrý naýqanyn sıfrlyndyrylady.
Bul memlekettik mekemelermen ıntegrasıalanǵan elektrondy aqparattyq baza. Bunda dáriger aldyna kelgen jastardyń árqaısysynyń medısınalyq kartasy men ózge málimetteri jazylǵan. Qazir bul joba Astanada pılottyq rejımde iske qosylǵan, dep habarlaıdy Almaty-akshamy.kz 24.kz-ke silteme jasap.
Áskerı komısarıat uzaq jyldar boıy qaǵazbastylyqtan aryla almaı, jańa tehnologıalar qosylmaı kele jatqan mekeme edi. Áskerge shaqyrý naýqanynda dárigerler barlyq aqparatty qolmen jazyp, toltyratyn. Bul árıne uzaq ýaqytty talap etedi. Endi elordadaǵy qorǵanys isteri jónindegi departamentterde elektrondy platforma bar jańa kompúterler ornatyldy. Bul júıe densaýlyq saqtaý mınıstrliginiń aqparattyq bazasymen ıntegrasıalanǵan. Iaǵnı, merzimdi shaqyrýǵa úmitkerlerdi tańdaý isi jeńildeı tústi.
«Eger biz dıspanserlik esepti ashyp qaraıtyn bolsaq, onda naýqas Shymkentte týa bitken júrek aýrýy dıagnozymen tirkelgenin kóre alamyz. Iaǵnı, bizge onyń ambýlatorlyq kartasyn izdep, naýqaspen saýalnama júrgizýdiń qajeti joq. Ýaqyt joǵaltpaımyz. Barlyǵyn osy bazadan kóre alamyz», - deıdi Almaty aýdany boıynsha medısınalyq komısıanyń tóraǵasy Gúlnár Bútinbaeva.
Bul júıe áskerge shaqyrylýshylar jaıly ózge de derekterdi alýǵa múmkindik beredi. Iaǵnı, jumys orny, bilimi, sottalmaǵandyǵy men týysqandary jaıly tolyq aqparat jazylǵan.
«Biz osy jerden bala áskerge jaramdy ma, joq pa birden kóre alamyz. Qosymsha aqparattar, saraptamalar alýdyń qajeti joq. Buryn ambýlatorlyq tekseriske 3, al stasıonarlyqqa 10 kúndeı joǵaltatynbyz», - deıdi Almaty aýdany boıynsha medısınalyq komısıanyń tóraǵasy Gúlnár Bútinbaeva.
Bul platformany qurýǵa kóp ýaqyt ketpegen. Júıe burynnan bar. Tek ol aýrýhanalar men emhanalarda da ǵana jumys istegen. Endi júıeniń kókjıegi keńeıip, áskerı komısarıattarǵa da ornatylǵan.
«Bul jobany endi ary qaraı Qorǵanys mınıstrliginiń júıelerimen ıntegrasıalaý qajet. Qazir vedomstvo tarapynan aldyn ala kelisim bar. Iaǵnı, áskerge shaqyrylýshylardyń medısınalyq tekseristeriniń qorytyndylaryn elektrondy formatqa kóshirý. Eger dárigerlerdiń qaraýy kezinde densaýlyǵyna baılanysty ýaqytsha keıinge qaldyrylsa, onda bul aqparat sol bala meken jaıy boıynsha tirkelgen emhananyń bazasynda birden kórsetiledi. Keıin óziniń ýchaskelik dárigeri ony kórip, em-dom sharalaryn taǵaıyndaıdy», - deıdi IT kompanıanyń dırektory Erkebulan Jánibekuly.
Jobada qaýipsizdik sharalary barynsha qarastyrylǵanyn aıta ketý kerek. Júıe tolyqqandy qorǵalǵan. Azamattardyń derbes aqparattary bógde birleýlerdyń qolyna ótip ketpeıdi. Bastysy, bul jańashyldyq jemqorlyqty da tómendetedi deıdi joba avtorlary.