Almatyda Ashyq mobıldi qosymshasynyń kómegimen QR-kody arqyly skanerleý nátıjeleri boıynsha 1449 turǵynnyń «qyzyl» mártebesi rastaldy.
Almatyda KVI taralýyn boldyrmaý jónindegi jedel shtabtyń derekteri boıynsha aǵymdaǵy jyldyń 9 sáýiri men 1 shildesi aralyǵynda Ashyq mobıldi qosymshasynyń kómegimen QR-kodyn skanerleý nátıjeleri boıynsha 1449 turǵynnyń «qyzyl» mártebesi rastaldy. Taǵy 370 turǵyn «sary» mártebege ıe.
Ashyq jobasy boıynsha jumys isteıtin kásipkerlik nysandarynyń kire beristerindegi skanerleý nátıjesi 716 turǵynnyń «qyzyl», 189 turǵynnyń «sary» mártebesin rastady. Aıta keterligi, «qyzyl» mártebesi bar 157 jáne «sary» mártebesi bar 40 turǵyn fıtnes ortalyqtary men baseınderge kirýge tyrysqan. Monsha men saýnada «qyzyl» mártebesi bar 39 adam, «sary» mártebesi bar 9 adam anyqtaldy. Kınoteatrlardyń kire beristerinde «qyzyl» mártebesi bar 71 turǵyn, «sary» mártebesi bar 34 adam anyqtaldy. Qoǵamdyq tamaqtaný oryndarynda «qyzyl» mártebesi bar 286 jáne «sary» mártebeli 56 turǵyn anyqtaldy. Al Almatynyń áýejaıyna «qyzyl» mártebedegi 89 jáne «sary» mártebeli 21 adam kirýge tyrysqan.
Alaıda, nysanǵa barmaı, skanerleý nátıjesinde, ıaǵnı úıde oqshaýlanǵandardyń ishinde 733 turǵynnyń «qyzyl», 181-iniń «sary» mártebeleri rastaldy. Anyqtalǵanyndaı, olar qoǵamdyq oryndarǵa, onyń ishinde baseınderge, saýnalarǵa, kafeler men meıramhanalar barýǵa tyrysqan.
Búginde úıde AMSK jáne Telemedısına ortalyǵynyń mobıldi toptarynyń baqylaýynda 2306 naýqas bar, olardyń 291-i sımptomsyz, 1970-i jeńil, 45-i ortasha aýyrlyq dárejesinde.
Aıtpaqshy, vaksınalaý pasporty Ashyq qosymshasymen biriktirilgen. Osylaısha, koronavırýstan vaksınanyń eki komponentin alǵan turǵyndar «jasyl» mártebege ıe bolady.