Qazaqstannyń Bilim jáne ǵylym mınıstri Asqat Aımaǵambetov Reseıdiń Perm ýnıversıtetindegi atysqa baılanysty pikir bildirdi, dep habarlaıdy Almaty-akshamy.kz QazAqparatqa silteme jasap.
«Perm ýnıversıtetinde atys saldarynan qaza bolǵandardyń týystary men jaqyndaryna kóńil aıtamyn. Zardap shekkenderdiń tezirek saýyǵyp ketýine tilektespin. Qazan qalasyndaǵy terakt kezinde jaqyndary qaza tapqandardyń jan jaralary áli de jazyla qoıǵan joq. Búgingi oqıǵa jyǵylǵanǵa judyryq bolyp otyr. Bul qaıǵyly oqıǵalar elimizdegi mektepterde, kolejder men joǵary oqý oryndaryndaǵy qaýipsizdikti kúsheıtýdiń qanshalyqty mańyzdy ekenin kórsetedi. Oqý oryndarynyń árbir basshysy balalardy qorǵaý máselesine basymdyq berýi tıis», - dedi mınıstr.
Sondaı-aq ol sózinde el Prezıdenti Qasym-Jomart Toqaevtyń bilim berý uıymdarynyń qaýipsizdigin qamtamasyz etý qajettiligin atap ótip, bul másele Úkimet otyrysynda egjeı-tegjeıli qaralyp, ákimdikterge tapsyrma berilgendigin jazdy. Sondaı-aq JOO basshylyǵyna oqý korpýstary men jataqhanalarda qaýipsizdikti kúsheıtý kerektigi aıtyldy.
Bul tapsyrmalar – jabdyqtardy túgendeý, jedel basqarý ortalyǵyna beınekameralardy qosýdy qamtamasyz etý, JOO kirý rejımin kúsheıtý jáne tótenshe jaǵdaı týyndaǵan kezde qabyldanatyn is-qımyldar boıynsha sabaqtar ótkizý.
Qazirgi ýaqytta mınıstrlik basqa memlekettik organdarmen birlesip bilim berý obektileriniń terorızmge qarsy qorǵalýyn uıymdastyrý boıynsha qujat ázirledi. Osy normatıvti-quqyqtyq aktini talqylaý barysynda 2000-nan astam suraq pen usynys kelip tústi. Bul qujat keıbir azamattardy alańdatatynyn bilemiz. Olar dabyl batyrmalaryn, beınebaqylaý júıesin, týrnıketterdi ornatýǵa jáne tótenshe jaǵdaıdaǵy oqý-jattyǵýlar ótkizýge qarsy ekendigin jazdy.
Men bul erejelerdiń balalarǵa qaýip tóndirmeıtinin, kerisinshe, olardyń qaýipsizdigin qamtamasyz etýge jáne mundaı jaǵdaılardyń aldyn alýǵa baǵyttalǵandyǵyn málimdeımin.
Árbir bilim berý uıymynda barlyq qaýipsizdik sharasy qabyldanýy qajet. Ákimdikter bul máseleni keshendi sheshý úshin qosymsha qarajat bólýde.
Atap aıtqanda, beınebaqylaý kamerasyn, kúzet sıgnalızasıasy men jedel basqarý ortalyǵyna beınekameralardy qosý, ótkizý rejımi uıymdastyrý jáne qaýipsizdik júıesiniń basqa da elementteri qarastyrylmaq.
Qyzmetkerler men oqýshylar tehnıkalyq sharalardan bólek, tótenshe jaǵdaı kezindegi is-qımyl alogorıtmin bilý qajet.
Sonymen qatar bilim berý uıymdarynda tárbıe jumysyn kúsheıtý de basty nazarda bolý kerek.
Biz bul máselelerge erekshe kóńil bólemiz», - deıdi Asqat Aımaǵambetov.