Qazaqstannyń Eńbek Eri, kıno jáne teatr ártisi Asanáli Áshimov te Joldaý jaıynda pikir bildirdi.
«Qasym-Jomart Kemelulynyń Qazaqstan halqyna Joldaýyndaǵy kezekten tys saılaý, 7 jyldyq merzimge saılaý – bular qulaqqa qonatyn áńgime. 7 jyl - qyzmet isteıtin isker adamǵa az merzim emes. Qazaq uǵymynda 7 degen kıeli san. Ulylarymyzdyń da aıtyp ketken sózderi bar. Prezıdenttiń osyǵan qatysty oıy, kózqarasy unaıdy. Ǵylym akademıasyn ornyna qoıý jaqsy bastama. Ásirese, Ulttyq qordan 18 jasqa deıingi balalaryń esebine qarjy aýdaryp otyrý – ata-ana úshin úlken kómek. Uly máseleniń ózi kishkentaı nárseden bastalady», – dedi Asanáli Áshimov.
Sondaı-aq Halyq ártisi jalǵan uran sózben emes, ispen dáleldeıtin ýaqyt jetkenin aıtady.
«Qazaqstan jan-jaqty jańarýy kerek. Uranmen emes, jańa ispen ósýimiz kerek. Talaı qıynshylyqtan halqym óter, biraq qoı ústine boztorǵaı jumyrtqalaıtyn zaman keler dep edi babalarymyz. Sol zaman kelgen bolýy kerek. Halyqtyń ál-aýqaty, mádenıeti, ádebıeti, ǵylymy ósip jatyr. Ǵylym akademıasy soǵan dálel. Bizdiń Prezıdentimiz dıplomat, saýatty, qarapaıym, sonysymen halyqqa unaıdy», – dedi Asanáli Áshimov.