Sondaı-aq Shyńǵys Aıtmatov atyndaǵy Halyqaralyq syılyqtyń ıegeri atandy
Qazaqstannyń Eńbek Eri, KSRO jáne Qazaqstannyń Halyq ártisi, kórnekti teatr jáne kıno akteri, profesor Asanáli Áshimov jýyrda Bishkek qalasynda ótken Qazaqstannyń mádenıet pen óner kúnderi aıasynda álemdik kınematografıanyń damýyna qosqan zor úlesi úshin Qyrǵyz Respýblıkasynyń «Aq İlbiris» (Belyı Ilbırıs) ulttyq kıno syılyǵyna ıe boldy. Sonymen qatar Shyńǵys Aıtmatov atyndaǵy Halyqaralyq syılyqtyń ıegeri atandy, dep habarlaıdy Almaty-akshamy.kz.
Bul týraly Facebook paraqshasynda rejıser Asqat Maemırov jazdy.
«Sonaý alpysynshy jyldardyń basynda qazaq teatr jáne kıno keńistigine «janartaý» bolyp kelgen Asanáli Áshimov – ult ónerindegi shyn maǵynasyndaǵy «qubylysqa» aınaldy.
Akterlik ónerdiń kórkemdik deńgeıiniń bıikteýine aıryqsha eńbek sińirgen sahnager, qazaq teatry men kıno ónerinde fılosofıalyq tanym men taǵylym qalyptastyrdy.
Asanáli Áshimov – ulttyq sahna men kıno óneriniń kókjıegin keńeıtip álemdik arenaǵa shyǵarýǵa at salysqan erekshe daryn ıesi. Sondyqtan Asanáli aǵa jasaǵan obrazdar galereıasy - ult qundylyǵy. Batys pen Shyǵys klasıkteriniń dramatýrgıasyn jatsynbaı, kásibı bıik turǵyda meńgere bildi.
Al qazaq klasıkasynyń zańǵar shyńdary – M.Áýezov, Ǵ.Músirepov, S. Muqanov, Á. Nurpeıisov, Sh. Aıtmatovtardyń dramatýrgıasyndaǵy keıipkerler boıyndaǵy ult muraty men múddesin óziniń ómirsheń bolmys-bitimimen órnektedi. Al kıno ónerindegi Asanáli Áshimov jasaǵan «Bekejan» obrazy – qazaq rýhynyń hrestomatıasy. Ańǵal batyrdyń bolmysyn halyq júregine shynaıy jetkize bilgen, akter danalyǵynyń, daralyǵynyń syry da - osynda! Sodan ba eken, qazaq óneri men Áshimov – egiz uǵym.
Asanáli Áshimovtiń sýretkerlik bolmysynyń ekinshi bir bıik qyry – rejıserligi. Iá, rejıser retinde kıno tilimen Shoqannyń asqaq armanyn, úrker úmitin, quıryqty juldyzdaı jarq etken akter ári tulpardyń tuıaǵy Saǵı Áshimovtiń beınesi arqyly jetkizse, «Qozy Kórpesh – Baıan sulý» «Qazaqfılmniń» altyn qoryna aınaldy. Al qazaq sahnalarynda teatr rejıseri retinde klasıkalyq dúnıelerdi ózindik qoltańbasymen sóılete bildi. Elimizdegi teatr pedagogıkasynda, Asanáli aǵamyzdyń ustaz retinde qaıtalanbas óz úni, mashyǵy men máneri, aıshyǵy men órnegi bar. Asanáli Áshimov shyǵarmashylyǵy «ult» uǵymynyń tereńine boılatady. Teatr men kınoda somdaǵan Asanáli aǵamyzdyń beıneleri óz kórermenine qanat bitirip, «janam» degen júrekterge ot beredi. Boıyńdaǵy «ulttyq rýhty» bıiktetedi. Bekejan, Qasymhan, Ataman Shadıarovtar beınesi namysyńdy mazdatyp, ádildik pen shyndyqtyń týyn jelbiretedi.
Asaǵań – qazaq óneriniń asqaq shyńdy Alataýy. Asanáli Áshimov shyńy eshqashan alasarmaıdy!» – dep jazdy ol.