Arzan baǵada jıhaz jasatpaq bolǵan almatylyqtar alaıaqtyń arbaýyna túsip qaldy.
Alataý aýdandyq polısıa basqarmasynda osyǵan uqsas 10 derek boıynsha sotqa deıingi tergeý amaldary júrgizilýde, dep habarlaıdy Almaty-akshamy.kz Polisia.kz-ke silteme jasap.
«QR QK-niń 190-baby 3-bóliginde kózdelgen qylmysty jasady degen kúdikke ilingen kúdikti ustaldy jáne óz kinásin moıyndady. Bizdiń málimetke sáıkes, 27 jastaǵy Almaty oblysynyń týmasy T. esimdi azamat Instagram jelisindegi akkaýnttar arqyly jıhaz jasaý týraly habarlandyrýlar jarıalaǵan. Qaskóı áleýetti tutynýshylardy qysqa merzimimen jáne qolaıly baǵamen qyzyqtyrdy. Azamattardyń senimine qıanat jasaý, aldaý arqyly aldyn ala tólem alǵan. Al túsken qarjyny ózi ıemdenip, óz qalaýy boıynsha paıdalanǵan. Qazirdiń ózinde 10 alaıaqtyq deregi anyqtaldy. Ol klıentterden ortasha eseppen 300 myń teńgeden 1,3 mıllıon teńgege deıin alǵan. Kúdiktiniń qylmystyq áreketinen kelgen jalpy shyǵyn 2,5 mıllıon teńgeden asady», – dedi Alataý aýdandyq Polısıa basqarmasynyń bastyǵy İlıas Ómirserikov.
Sondaı-aq, Almaty qalasynyń prokýratýrasy alaıaqtyq týraly eskertedi. Alaıaqtyqtyń qurbany bolmaý úshin eshkimge derbes derekterdi, bank kartalarynyń derektemelerin habarlamaýdy, aýdarymdar týraly túbirtekterdi, kodtardy jáne kodtyq sózderdi, onyń ishinde bank jáne quqyq qorǵaý organdarynyń qyzmetkerleri bolyp tabylatyn tulǵalarǵa bermeýge keńes beredi.